बारामतीत अडीच लाख जनावरांचे लसीकरण

काटेवाडी : तालुक्यात तीन लाख १४ हजार ७२४ पशुधनांपैकी विविध आजाराला प्रतिबंधात्मक उपाययोजनांच्या अनुषंगाने दोन लाख ६० हजार ६४४ इतक्या जनावरांचे मान्सूनपूर्व लसीकरण पूर्ण केले आहे. उर्वरित जनावरांचे लसीकरण करण्याचे काम सुरू आहे, अशी माहिती पशुधन विकास अधिकारी डॉ. धनंजय पोळ यांनी दिली आहे.
तालुक्यात (गाय आणि म्हैसवर्ग) एकूण १ लाख ३३ हजार ८३३ मोठी जनावरांपैकी घटसर्प आहाराकरिता २३ हजार १९५, फऱ्या ३ हजार ८२९, लाळखुरकुत १ लाख २५ हजार ५२, लम्पी ७९ हजार ४३४ इतक्या जनावरांना तसेच एकूण १ लाख ८० हजार ८४१ शेळ्या व मेंढ्या असून त्यापैकी आंत्रविषार या आजाराकरीता २९ हजार १३४ जनावरांना प्रतिबंधात्मक लसीकरण करण्यात आले आहे.
जनावरे आजारी पडल्यास शासकीय दवाखान्यात त्वरित संपर्क करून डॉक्टरांच्या सल्ल्यानुसार पुढील उपचार करून घ्यावेत, गोठ्यातील स्वच्छता, निवारा यांचे योग्य नियोजन करावे, संबंधित ग्रामपंचायतीकडून परिसरामध्ये कीटकनाशक फवारणी करून घ्यावी, असे आवाहन डॉ. पोळ यांनी केले आहे.