पीक प्रात्यक्षिकांसाठी निवड होणार ऑफलाइन

काटेवाडी, ता. १४ : राष्ट्रीय अन्न सुरक्षा व पोषण अभियान, राष्ट्रीय खाद्यतेल अभियान-तेलबिया आणि आरकेव्हीवाय महाराष्ट्र पौष्टिक तृणधान्य अभियानांतर्गत सन २०२५-२६ मध्ये पीक प्रात्यक्षिकांसाठी गट लाभार्थ्यांची निवड आता ऑफलाइन पद्धतीने होणार आहे. याबाबतचा निर्णय कृषी संचालक आर. एस. नायकवाडी यांनी बुधवारी (ता.११) जाहीर केला आहे.

महाडिबीटी संकेतस्थळाद्वारे प्रथम अर्ज, प्रथम प्राधान्य तत्त्वावर ऑनलाइन निवड प्रक्रिया राबवली जात होती. मात्र, संकेतस्थळावरील तांत्रिक अडचणींमुळे ही प्रक्रिया आता ऑफलाइन करण्यात येणार आहे. राज्य शासनाच्या यापूर्वीच्या अध्यादेशा अन्वये योजनांना प्रशासकीय मान्यता मिळाली असून, मार्गदर्शक सूचना क्षेत्रीय पातळीवर देण्यात आल्या आहेत. आतापर्यंत महाडिबीटी संकेतस्थळावर ८३४ गट लाभार्थ्यांची निवड पूर्ण झाली असून, त्यांची यादी संबंधित अधिकाऱ्यांना पाठवण्यात आली आहे. नव्या सूचनांनुसार, ऑफलाइन निवड प्रक्रिया पारदर्शकपणे आणि मार्गदर्शक सूचनांच्या अधीन राहून करावी लागेल. एक गाव, एक गट, एक प्रात्यक्षिक या तत्त्वावर पीक प्रात्यक्षिकांची अंमलबजावणी होणार आहे. यामुळे एका गावातून एकापेक्षा जास्त गटांचे अर्ज प्राप्त झाल्यास निवड प्रक्रिया पारदर्शकपणे राबवण्याचे निर्देश देण्यात आले आहेत. ऑफलाइन निवड झालेल्या गटांची नोंदणी महाडिबीटी संकेतस्थळावर करणे आणि त्यांची माहिती केंद्र शासनाच्या कृषी मॅपर संकेतस्थळावर भरणे बंधनकारक आहे. तसेच, गटातील लाभार्थी सभासदांकडे शेतकरी ओळखपत्र असणे आवश्यक आहे.
दरम्यान, यापूर्वी महाडिबीटी संकेतस्थळावर अर्ज सादर केलेल्या, परंतु प्रथम अर्ज, प्रथम प्राधान्य तत्त्वावर निवड न झालेल्या पात्र अर्जदारांना ऑफलाइन निवडीत प्राधान्य देण्यात येईल. शिल्लक लक्ष्यांकानुसार ऑफलाइन निवड प्रक्रिया तातडीने पूर्ण करण्याचे निर्देश विभागीय कृषी सहसंचालक आणि जिल्हा अधीक्षक कृषी अधिकाऱ्यांना देण्यात आले आहेत..