वैष्णवांच्या मदतीस आरोग्य यंत्रणा सज्ज

काटेवाडी, ता. २० : संत तुकाराम महाराजांच्या पालखी सोहळ्यासाठी बारामती तालुका आरोग्य विभागाने वारकऱ्यांच्या आरोग्य सेवेसाठी व्यापक व्यवस्था केली आहे. या वर्षीचा पालखी सोहळा १८ जून ते ६ जुलै कालावधीत होणार असून, बारामती तालुक्यात २५ जून ते २७ जून या कालावधीत पालखी मुक्काम करेल. या दरम्यान आरोग्य विभागाचे ११० वैद्यकीय अधिकारी व कर्मचारी तैनात असणार आहेत.
वारकऱ्यांच्या सोयीसाठी आणि सुरक्षिततेसाठी आरोग्य विभागाने सर्वसमावेशक उपाययोजना केल्या आहेत. पालखीचा मुक्काम आणि संत तुकाराम महाराज यांची पालखी २५ जून रोजी उंडवडी येथे, तर २६ आणि २७ जून रोजी बारामती शहरात मुक्काम करेल. पालखी मार्गावरील गावांमध्ये खराडेवाडी, उंडवडी सुपे, उंडवडी क.प., बऱ्हाणपूर, कऱ्हावागज, मोरेवाडी, मेडद, गुणवडी (मोतीबाग), पिंपळी आणि काटेवाडी यांचा समावेश आहे. या मार्गावर वारकऱ्यांना आवश्यक सुविधा पुरवण्यासाठी बारामती नगरपरिषद आणि आरोग्य विभाग युद्धपातळीवर काम करत आहे, अशी माहिती तालुका आरोग्य अधिकारी डॉ. मनोज खोमणे यांनी दिली.

आरोग्य सुविधा केंद्र
मोरगाव, शिर्सुफळ, माळेगाव, डोरलेवाडी आणि काटेवाडी येथे प्राथमिक आरोग्य केंद्रे कार्यरत असतील. याशिवाय, खराडेवाडी, उंडवडी सुपे, कऱ्हावागज, मोरेवाडी, मेडद, गुणवडी (मोतीबाग), पिंपळी आणि काटेवाडी येथे उपकेंद्रे उपलब्ध असतील.

रुग्णालये
बारामती येथील उपजिल्हा रुग्णालय आणि अहिल्याबाई होळकर वैद्यकीय महाविद्यालय वारकऱ्यांना २४ तास बाह्य रुग्ण सेवा देणार आहे. याशिवाय, रुई येथील ग्रामीण रुग्णालय देखील सज्ज ठेवण्यात आले आहे.

तात्पुरती औषधोपचार केंद्रे
पालखी मार्गावर १३ तात्पुरती औषधोपचार केंद्रे स्थापन केली जाणार आहेत. यामध्ये उंडवडी सुपे, मोरगाव, बऱ्हाणपूर, शिर्सुफळ, पिंपळी, काटेवाडी आणि बारामती येथील प्राथमिक आरोग्य केंद्रांचा समावेश आहे. तसेच, १५ फिरती औषधोपचार केंद्रेही कार्यरत असतील.

रुग्णवाहिका : पालखी मार्गावर २० रुग्णवाहिका उपलब्ध असतील, ज्या उंडवडी, गुणवडी, काटेवाडी आणि शिर्सुफळ येथे तैनात राहतील.

स्वच्छतेला महत्त्व
पालखी मार्गावर ९६ हॉटेल्स उपलब्ध असतील, जिथे वारकऱ्यांना अन्न आणि निवासाची सोय होईल. तसेच, स्वच्छतेच्या दृष्टीने बारामती सजग नागरिक मंच आणि नगरपरिषदेने शौचालय व्यवस्थापनाचे नियोजन केले आहे. पालखी मार्गावरील ग्रामपंचायतींमध्ये खराडेवाडी, उंडवडी क.प., बऱ्हाणपूर, मेडद, मोतीबाग, गुणवडी, पिंपळी आणि काटेवाडी यांचा समावेश आहे, जिथे स्थानिक पातळीवर सर्व सुविधा पुरवल्या जातील.

पाण्याची व्यवस्था
पालखी मार्गावर पिण्याच्या पाण्याची सोय करण्यासाठी २० ठिकाणी पाण्याचे स्रोत उपलब्ध करून देण्यात आले आहेत. यामध्ये उंडवडी, गुणवडी, काटेवाडी आणि शिर्सुफळ येथे टँकर भरण्याची व्यवस्था आहे. तसेच, बारामती नगरपरिषदेने पालखी तळावर स्वच्छ पाण्याची उपलब्धता सुनिश्‍चित केली आहे.

मनुष्यबळ
आरोग्य विभागाने ११० कर्मचाऱ्यांचे मनुष्यबळ तैनात केले आहे, ज्यामध्ये १८ वैद्यकीय अधिकारी, २९ समुदाय आरोग्य अधिकारी, १४ आरोग्य सहाय्यक, २३ आरोग्य सेवक आणि ३ आरोग्य सेविका यांचा समावेश आहे. याशिवाय, तुळजाराम चतुरचंद महाविद्यालय आणि विद्या प्रतिष्ठानच्या १,२०० स्वयंसेवकांची मदत घेतली जाणार आहे.

संत सोपानकाकांच्या सोहळ्यासाठी सुविधा
याच कालावधीत, संत सोपानकाका महाराज यांच्या पालखी सोहळ्यासाठी देखील समान सुविधा उपलब्ध करून देण्यात आल्या आहेत. या पालखीचा मुक्काम २५ जून ते २९ जून दरम्यान निंबूत, सोमेश्‍वर कारखाना, कोऱ्हाळे बुद्रुक आणि बारामती शहरात होईल. पाण्याची व्यवस्था निंबूत, करंजेपूल, वडगाव निंबाळकर, कोऱ्हाळे बुद्रुक, माळेगाव बुद्रुक, गुणवडी (मोतीबाग) आणि पिंपळी येथे उपलब्ध असेल. तसेच, १४८ रुग्णवाहिका आणि १२ तात्पुरती औषधोपचार केंद्रे या पालखी मार्गावर कार्यरत असतील.