‘संवाद वारी’ प्रदर्शनातून शासकीय योजनांची माहिती

काटेवाडी, ता. २५ : संत तुकाराम महाराज पालखी सोहळ्यासोबत शासनाच्या लोककल्याणकारी योजनांची माहिती देणारे ‘संवाद वारी’ चित्र प्रदर्शन यंदा भाविकांसाठी खास ठरत आहे. बारामती तालुक्यातील उंडवडी गवळ्याची पालखीतळ येथे बुधवार (ता. २५) आणि बारामती शहरातील नगरपरिषद परिसरात गुरुवारी (ता. २६) हे प्रदर्शन भरविण्यात आले आहे. माहिती व जनसंपर्क महासंचालनालयामार्फत आयोजित या प्रदर्शनात एलईडी व्हॅन, चित्ररथ आणि कलापथकाद्वारे शासकीय योजनांची जनजागृती होणार आहे.
प्रदर्शनात ३० फ्लेक्स पॅनेल्सद्वारे शासनाच्या विविध योजनांची माहिती देण्यात येणार आहे. यात मुख्यमंत्री पशुस्वास्थ्य योजना, किसान क्रेडिट कार्ड, पशुधन अभियान, बळीराजा शेतकरी योजना, सुरक्षित अन्न तपासणी, सौर कृषी वाहिनी योजना, ॲग्रीस्टॅक नोंदणी, ‘महाविस्तार-एआय’ ॲप, सायबर सुरक्षितता, जलसिंचन प्रकल्प, ज्येष्ठ नागरिक कक्ष, तृतीयपंथी कल्याण मंडळ, अनुसूचित जमाती आयोग, प्रधानमंत्री आवास योजना टप्पा-२, रमाई, शबरी, अटल बांधकाम कामगार वसाहत, पुण्यश्‍लोक अहिल्यादेवी होळकर आणि मोदी आवास योजना यांचा समावेश आहे. याशिवाय, सहकार विभागाच्या ऑनलाइन सेवा, राज्य इलेक्ट्रिक वाहन धोरण २०२५, गोवारी बांधवांसाठी स्वतंत्र योजना, दिव्यांग विभाग आणि राष्ट्रीय शैक्षणिक धोरण २०२० ची माहितीही प्रदर्शनात उपलब्ध आहे. पालखी मार्गावरील मुक्काम तळांवर आणि संपूर्ण मार्गावर चित्ररथ, कलापथक आणि एलईडी व्हॅनद्वारे या योजनांची माहिती भाविकांपर्यंत पोहोचवली जाणार आहे. नागरिकांनी या प्रदर्शनाचा लाभ घ्यावा, असे आवाहन जिल्हा माहिती कार्यालयाने केले आहे.