पालेभाज्यांची आवक जळोची येथे वाढली पालेभाज्यांची आवक जळोची येथे वाढली

काटेवाडी, ता. ७ : बारामती कृषी उत्पन्न बाजार समितीच्या जळोची उपबाजारात सोमवारी (ता. ७) १५ हजार ८०० पेंडी पालेभाज्यांची आवक झाली. यामध्ये कांदापात, कोथिंबीर, मेथी, पालक, शेपू, करडी, तांदूळजा, पुदीना आणि मुळा यांचा समावेश आहे.
पावसाळी हवामानामुळे या पालेभाज्यांचे उत्पादन वाढले आहे. पाऊस आणि थंड हवामान यामुळे पिकांची वाढ जलद होत आहे. स्थानिक शेतकरी कमी खर्चात जास्त नफा मिळवण्यासाठी कोथिंबीर, मेथी आणि शेपू यांसारख्या तरकारी पिकांची लागवड मोठ्या प्रमाणात करत आहेत. यामुळे जळोची उपबाजारात या पालेभाज्यांचा पुरवठा वाढला आहे. विशेषतः कोथिंबीर आणि मेथीला मोठी मागणी असल्याने शेतकरी या पिकांकडे आकर्षित झाले आहेत. बारामती, इंदापूर, फलटण, दौंड चा काही भाग आदी परिसरातून ताजा माल बाजारात येत आहे, ज्यामुळे ग्राहकांना दर्जेदार पालेभाज्या मिळत आहेत. मात्र, मोठ्या आवकेमुळे काही पालेभाज्यांचे बाजारभाव तुरळक प्रमाणात कमी झाल्याचे दिसून येत आहे.