शेतकऱ्यांच्या कोरडवाहू शेतीला बळ

काटेवाडी, ता. १५ : कोरडवाहू शेतीला बळ देण्यासाठी आणि शेतकऱ्यांना पाण्याची सोय उपलब्ध करून देण्यासाठी वैयक्तिक शेततळ्यांची योजना सुरू आहे. यामुळे शेतकऱ्यांना शेततळे बांधण्यासाठी १४,४३३ ते ७५,००० रुपयांपर्यंत अनुदान मिळेल. पाण्याचे पुनर्भरण, पिकांचे संरक्षण आणि उत्पादनात वाढ यासाठी ही योजना उपयुक्त ठरणार आहे. ३४ जिल्ह्यांत लागू असलेल्या या योजनेसाठी ऑनलाइन अर्ज करून प्रथम येणाऱ्यास प्रथम प्राधान्य दिले जाते.
या योजनेचा मुख्य हेतू शेतकऱ्यांना पाण्याची उपलब्धता वाढवणे आणि संरक्षित सिंचनाची सोय करणे आहे. शेततळ्यांमुळे भूगर्भातील पाण्याचे पुनर्भरण होईल, आपत्कालीन परिस्थितीत पिकांना पाणी मिळेल आणि अतिरिक्त पावसाचे पाणी साठवता येईल. शिवाय, चिबड व पाणथळ जमिनींची सुधारणा आणि पीक उत्पादनात वाढ हेही उद्दिष्ट आहे. ही योजना शेतकऱ्यांना पाण्याची कमतरता भासू नये याची खात्री करते. शेततळ्यांमुळे शेती उत्पादन वाढेल आणि शेतकऱ्यांचे उत्पन्न सुधारेल. योजनेचा लाभ घेण्यासाठी शेतकऱ्यांनी नजीकच्या कृषी विभागाशी संपर्क साधावा किंवा ऑनलाइन अर्ज करावा.

योजनेचे स्वरूप...
वैयक्तिक शेततळ्यांसाठी शेतकऱ्यांना किमान १४,४३३ रुपये आणि कमाल ७५,००० रुपये अनुदान मिळेल. शेतकऱ्यांनी https://mahadbt.maharashtra.gov.in/ farmer/login/ login या संकेतस्थळावर ऑनलाइन अर्ज करावा. प्रथम येणाऱ्यास प्रथम प्राधान्य या तत्त्वावर तालुकानिहाय लक्ष्य ठरवून लाभार्थ्यांची निवड होते. शेततळे पूर्ण झाल्यावर अनुदान शेतकऱ्याच्या आधार संलग्न बँक खात्यात पीएफएमएस प्रणालीद्वारे जमा केले जाते.

या शेतकऱ्यांना मिळणार लाभ
* शेतकऱ्याकडे किमान ०.४० हेक्टर जमीन असावी (कोकणात ०.२० हेक्टर).
* कमाल क्षेत्राची मर्यादा नाही.
* जमीन शेततळे खोदण्यासाठी तांत्रिकदृष्ट्या योग्य असावी, जेणेकरून पावसाचे पाणी साठवता येईल.
* यापूर्वी मागेल त्याला शेततळे, सामूहिक शेततळे किंवा इतर शासकीय योजनांतून शेततळ्यासाठी अनुदान घेतलेले नसावे.

असे आहे अनुदान
शेतकऱ्याने मागणी केलेल्या आणि प्रत्यक्ष बांधलेल्या शेततळ्याच्या आकारमानानुसार १४,४३३ ते ७५,००० रुपयांपर्यंत अनुदान मिळेल. शेततळ्याचे मापन करून मापन पुस्तिकेत नोंद होते आणि त्यानुसार अनुदान दिले जाते.