कृषी यांत्रिकीकरणासाठी नोंदणी अनिवार्य

काटेवाडी, ता. १७ : ‘‘कृषी यांत्रिकीकरण उपअभियान कार्यक्रम २०२५-२६ अंतर्गत सर्व उत्पादकांना केंद्र शासनाच्या agrimachinery.nic.in या संकेतस्थळावर स्वतःची नोंदणी करणे अनिवार्य केले आहे. यासंदर्भात ५ मे २०२५ आणि ५ जून २०२५ रोजी दिलेल्या मार्गदर्शक सूचनांनुसार केंद्रीकृत संकेत प्रणालीची अंमलबजावणी बंधनकारक केली आहे. या सूचनांनुसार सर्व उत्पादकांनी संकेतस्थळावर नोंदणी करून त्यांचा नोंदणी क्रमांक प्राप्त करणे आवश्यक आहे,’’ अशी माहिती पुणे कृषी अभियांत्रिकी संचालनालयाचे संचालक अंकुश माने यांनी दिली.
उत्पादकांनी संकेतस्थळावर भेट देऊन कृषी यांत्रिकीकरणात थेट लाभ हस्तांतरण हा पर्याय निवडावा. त्यानंतर नागरिक कट्टामधील उत्पादक आणि वितरक तपशील जाणून घ्या, या पर्यायामध्ये महाराष्ट्र राज्याची निवड केल्यास राज्यात कार्यरत आणि नोंदणीकृत उत्पादकांची यादी उपलब्ध होईल. ही यादी केंद्र शासनाच्या संकेतस्थळावर वारंवार अद्ययावत केली जाते. त्यामुळे उत्पादकांनी नियमितपणे संकेतस्थळ तपासावे, असे आवाहन करण्यात आले आहे.

केवळ उत्पादकांसाठी नोंदणी अनिवार्य
केंद्र शासनाच्या मार्गदर्शक सूचनांनुसार, फक्त उत्पादकांची नोंदणी अनिवार्य आहे, तर वितरकांना नोंदणी करणे बंधनकारक नाही. यानुसार, संबंधित यंत्रणांनी कार्यवाही करावी, असे निर्देश माने यांनी दिले आहेत.

शेतकऱ्यांसाठी महत्त्वाचा कार्यक्रम
हा केंद्र शासनाचा महत्त्वाकांक्षी कार्यक्रम आहे, ज्यामुळे शेतकऱ्यांना आधुनिक यंत्रसामग्री उपलब्ध होऊन शेतीची उत्पादकता वाढवण्यास मदत होणार आहे. या उपक्रमांतर्गत नोंदणीकृत उत्पादकांकडूनच यंत्रसामग्री खरेदी केल्यास शेतकऱ्यांना अनुदानाचा लाभ मिळू शकेल. त्यामुळे उत्पादकांनी वेळेत नोंदणी करून यादीत समाविष्ट होणे आवश्यक आहे.

कार्यवाहीसाठी निर्देश
या संदर्भात सर्व जिल्हा अधीक्षक कृषी अधिकाऱ्यांना आणि विभागीय कृषी सहसंचालकांना आवश्यक कार्यवाहीसाठी निर्देश दिले आहेत. याबाबत अधिक माहितीसाठी शेतकरी आणि उत्पादकांनी कृषी आयुक्तालय, पुणे यांच्याशी संपर्क साधावा, असे आवाहन केले आहे.