फळबाग लागवडीसाठी शेतकऱ्यांना मिळणार अर्थसाहाय्य
काटेवाडी, ता. २०: महाराष्ट्र शासनाने भाऊसाहेब फुंडकर फळबाग लागवड योजनेसाठी २०२५- २६ मध्ये १०४.५ कोटी रुपये निधी मंजूर केला आहे. या योजनेद्वारे शेतकऱ्यांना फळबाग लागवडीसाठी अर्थसाहाय्य मिळणार असून, प्रलंबित प्रकरणे निकाली काढल्यानंतर उर्वरित निधी नवीन पात्र लाभार्थ्यांना वितरित केला जाईल.
याबाबत राज्य शासनाने १८ जुलै रोजी अध्यादेश काढला आहे. यामुळे शेतकऱ्यांना फळबाग लागवड सुलभ होण्याची अपेक्षा आहे. महात्मा गांधी राष्ट्रीय ग्रामीण रोजगार हमी योजनेत पात्र नसलेल्या शेतकऱ्यांसाठी सन २०१८ मध्ये भाऊसाहेब फुंडकर फळबाग लागवड योजना सुरू केली आहे. सन २०२३ मध्ये योजनेच्या सुधारित मापदंडांना मंजुरी देण्यात आली. संचालक (फलोत्पादन), कृषी आयुक्तालय, पुणे यांनी सादर केलेल्या प्रस्तावानुसार, शासनाने सन २०२५- २६ साठी १०४.५ कोटी रुपये मंजूर केले आहेत. निधी खर्च करताना महाराष्ट्र अर्थसंकल्प नियम पुस्तिका आणि वित्तीय अधिकार नियम पुस्तिकेतील तरतुदी तसेच नियोजन आणि वित्त विभागाच्या मार्गदर्शक सूचनांचे काटेकोरपणे पालन करावे, असे शासनाने स्पष्ट केले आहे.
मंजूर निधीचे वर्गवारीनुसार वाटप खालीलप्रमाणे
सर्वसाधारण: १०० कोटी रुपये
अनुसूचित जाती: ४ कोटी
अनुसूचित जमाती: ५० लाख रुपये
एकूण: १०४.५ कोटी रुपये
प्रलंबित प्रकरणांना प्राधान्य
शासनाने निर्देश दिले आहेत की, चालू वर्षातील प्रलंबित प्रकरणांना प्रथम निधी वापरावा. प्रलंबित प्रकरणे निकाली निघाल्यानंतर उर्वरित निधी २०२५- २६ मधील पात्र लाभार्थ्यांना वितरित केला जाईल.
अंमलबजावणीचे निर्देश
योजनेची अंमलबजावणी २०१८ आणि २०२३ च्या शासन निर्णयातील तरतुदी व सुधारणांनुसार होईल.
कृषी आयुक्तांनी क्षेत्रीय यंत्रणेसाठी सविस्तर मार्गदर्शक सूचना जारी कराव्यात.
संचालक (फलोत्पादन) यांनी योजनेच्या प्रगतीचा आढावा घेऊन अहवाल शासनाला सादर करावा, असे निर्देश राज्य शासनाने दिले आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.