बारामतीत लंपीची ३२ जनावरांना बाधा

काटेवाडी, ता. २४ : बारामती तालुक्यात लंपी स्कीन रोगाने ३२ जनावरे बाधित झाली आहेत. यापैकी १९ जनावरे उपचारानंतर पूर्णपणे बरी झाली आहेत.तर १३ जनावरांवर सध्या उपचार सुरू आहेत. आतापर्यंत तालुक्यातील ९३,७४७ जनावरांना लंपी प्रतिबंधात्मक लसीकरण केले आहे. मात्र, या रोगामुळे तालुक्यात एकही जनावर दगावले नाही, अशी माहिती बारामतीतील पशुसंवर्धन अधिकारी डॉ. डी. आर. पोळ यांनी दिली.

दोन वर्षांनंतर लंपी स्कीन हा गंभीर रोग पुन्हा एकदा जनावरांमध्ये पसरू लागला आहे. यामुळे पशुपालकांमध्ये चिंतेचे वातावरण आहे. विशेषतः: मोठ्या गोठ्यांमध्ये रोगाची लागण झाल्यास पशुपालकांचे आर्थिक नुकसान होण्याची भीती आहे. यंदा पशुसंवर्धन विभागाने प्रतिबंधात्मक उपाययोजनांवर विशेष लक्ष केंद्रित केले आहे.

पशुसंवर्धन विभागाने तालुक्यातील सर्व ग्रामपंचायतींना गोचीड आणि गोमाशा निर्मूलनासाठी सूचना दिल्या आहेत. याशिवाय, खालील उपाययोजनांचे निर्देश देण्यात आले, असे पोळ यांनी सांगितले.

प्रतिबंधात्मक उपाययोजना
* लसीकरण न झालेल्या भागात बाधित जनावरे आढळल्यास त्यांना निरोगी जनावरांपासून वेगळे ठेवावे.
* संभाव्य रोगी जनावरांना निरोगी कळपात मिसळण्यास बंदी.
* रोगग्रस्त भागातील बाधित आणि निरोगी जनावरांना एकत्र चरायला सोडण्यास मनाई.
* डास, गोचीड यांचा बंदोबस्त करणे, निरोगी जनावरांवर किडे-प्रतिबंधक औषध लावणे आणि गोठ्यांमध्ये औषध फवारणी.
* रोगग्रस्त भागातील जनावरांना रोगमुक्त क्षेत्रात किंवा स्थानिक बाजारात नेण्यास प्रतिबंध.
* लसीकरण राहिलेल्या जनावरांसाठी वरिष्ठ कार्यालयाकडून लस मागवण्यात आली आहे,

लंपी रोगाची कारणे
१. लंपी स्कीन रोग कॅप्रीपॉक्स विषाणूमुळे होतो. जो शेळ्या व मेढ्यांमधील देवी रोगाच्या विषाणूशी संबंधित आहे. हा रोग डास, चावणाऱ्या माशा, गोचीड, चिलटे, बाधित जनावरांचा स्पर्श, दूषित चारा आणि पाण्याद्वारे पसरतो.

गोठ्यांमधील गोमाशा आणि गोचीड निर्मूलनासाठी ग्रामपंचायतींच्या सहकार्याने उपाययोजना केल्या जात आहेत. लसीकरणापासून वंचित राहिलेल्या जनावरांसाठी लस मागवण्यात आल्याचे पशुसंवर्धन विभागाने स्पष्ट केले.
- डॉ. डी. आर. पोळ, तालुका पशुसंवर्धन अधिकारी बारामती