अपघाग्रस्त शेतकऱ्यांना दिलासा

काटेवाडी, ता. १ : जिल्ह्यात गोपीनाथ मुंडे शेतकरी अपघात सुरक्षा सानुग्रह अनुदान योजनेअंतर्गत १ एप्रिल २०२५ पासून १३२ प्रस्ताव प्राप्त झाले आहेत. यापैकी ५८ प्रस्तावांना मंजुरी मिळाली असून, त्यासाठी १ कोटी १६ लाख रुपये निधी लागणार आहे. कागदपत्रांच्या कमतरतेमुळे ६७ प्रस्ताव प्रलंबित असून, ५ प्रस्ताव नामंजूर झाले आहेत. दोन प्रस्ताव तालुकास्तरीय समितीसमोर ठेवले गेले नाहीत, अशी माहिती जिल्हा कृषी अधीक्षक संजय काचोळे यांनी दिली.
ही योजना शेतकऱ्यांना अपघातामुळे मृत्यू किंवा अपंगत्व आल्यास आर्थिक मदत देण्यासाठी राबवली जाते. शेती व्यवसायाशी संबंधित किंवा इतर कारणांमुळे होणाऱ्या अपघातांमुळे कुटुंबाचे उत्पन्नाचे साधन बंद झाल्यास त्यांना आधार देणे हा योजनेचा उद्देश आहे. १९ एप्रिल २०२३ पासून सुधारित स्वरूपात ही योजना थेट अनुदान तत्त्वावर राबवली जात आहे. यापूर्वी विमा कंपन्यांमार्फत राबवली जाणारी ही योजना आता कृषी विभागामार्फत सुलभ पद्धतीने लागू आहे. ज्यामुळे शेतकऱ्यांना जलद लाभ मिळण्यास मदत होते.
दरम्यान, कागदपत्रांच्या कमतरतेमुळे प्रलंबित ६७ प्रस्तावासाठी शेतकऱ्यांनी लवकरात लवकर कागदपत्रे पूर्ण करावीत. तालुका आणि जिल्हास्तरावर कार्यरत समित्या प्रस्तावांचा निपटारा जलदगतीने करत आहेत. शेतकऱ्यांनी आपल्या गावातील तलाठी किंवा तालुका कृषी कार्यालयाशी संपर्क साधावा, असे प्रशासनाने कळवले आहे.

योजनेचे निकष
लाभार्थी : शेतकरी किंवा त्यांचे कुटुंबीय (७/१२ उताऱ्यावर नाव असलेले).
अपघातांचे प्रकार : रस्ता-रेल्वे अपघात, सर्पदंश, वीज पडणे, पाण्यात बुडणे, विषबाधा, जनावरांचा हल्ला, दंगल.
अनुदान रक्कम : अपघाती मृत्यू किंवा दोन अवयव निकामी झाल्यास २ लाख रुपये.
एक अवयव किंवा एक डोळा निकामी झाल्यास १ लाख रुपये.
वयोमर्यादा : १० ते ६० वर्षे.
अर्ज सादर करण्याची मुदत : अपघातानंतर ६० दिवसांच्या आत.

आवश्यक कागदपत्रे
७/१२ उतारा, मृत्यूचा दाखला (मृत्यूच्या बाबतीत), पंचनामा, प्रथम माहिती अहवाल (एफआयआर), वारस नोंद, आधार कार्ड, बँक खाते पुस्तक, अपंगत्वाचा दाखला (आवश्यक असल्यास).