मागणी वाढल्याने उत्पादकांचे चेहरे फुलले

काटेवाडी, ता. ४ : श्रावण महिन्याच्या पार्श्वभूमीवर बारामती येथील फूल बाजारात पूजा, हार आणि मंदिरांच्या सजावटीसाठी फुलांना मागणी वाढली आहे. विविध फुलांची आवक चांगली असल्याने बाजारातील बाजारभाव स्थिर राहिले आहेत. असे असले तरी विक्रीत मोठ्या प्रमाणात वाढ झाली आहे. यामुळे फूल उत्पादक व विक्रेत्यांचे चेहरे फुलले आहेत.

राज्य सरकारने एक जुलैपासून कृत्रिम आणि प्लास्टिकच्या फुलांवर घातलेल्या बंदीची अंमलबजावणी प्रभावीपणे न झाल्याने फूल विक्रेते आणि उत्पादक शेतकऱ्यांना अपेक्षित फायदा झालेला नाही. परिणामी, बाजारात अजूनही प्लॅस्टिकची फुले उपलब्ध असून, फूल बाजाराचे चित्र जैसे थे राहिल्याचे व्यापाऱ्यांचे म्हणणे आहे.
बारामती येथील कृषी उत्पन्न बाजार समितीच्या फूल बाजारात सध्या बारामती, इंदापूर, फलटण येथून बारामती कृषी उत्पन्न बाजार समितीच्या फूल बाजारात फुलांची आवक होत आहे. गेल्या दोन दिवसांत या फुलांच्या किमतीत फारसा बदल झालेला नाही. स्थानिक फूल व्यापारी नितीन झगडे यांनी सांगितले की, ग्राहक आणि हार विक्रेत्यांकडून चांगल्या प्रतीच्या फुलांना मागणी आहे. नवीन लागवडी सुरू झाल्याने फुलांची आवक वाढली आहे, त्यामुळे बाजारभाव स्थिर आहेत. श्रावण महिन्यात फुलांची मागणी पाहता, येत्या काळातही ही मागणी कायम राहण्याची शक्यता आहे. श्रावण महिन्यातील सण-उत्सव आणि धार्मिक विधींमुळे फुलांची मागणी सातत्याने वाढत आहे. नवीन लागवडींमुळे बाजारात फुलांची उपलब्धता चांगली आहे, त्यामुळे दरवाढीचा प्रश्न सध्या तरी उद्भवलेला नाही.

प्लॅस्टिक फुलांवरील बंदीचा प्रभाव शून्य
शासनाने पर्यावरण संरक्षणाच्या दृष्टिकोनातून एक जुलै २०२५ रोजी कृत्रिम आणि प्लॅस्टिकच्या फुलांवर बंदी घालण्याचा निर्णय घेतला. मात्र, या निर्णयाची कठोर अंमलबजावणी न झाल्याने बाजारात अजूनही प्लॅस्टिकची फुले सहज उपलब्ध आहेत. याचा परिणाम स्थानिक फूल उत्पादक शेतकरी आणि विक्रेत्यांच्या व्यवसायावर झाला आहे. प्लॅस्टिकच्या फुलांवरील बंदी केवळ कागदोपत्री आहे. जोपर्यंत कडक अंमलबजावणी होत नाही, तोपर्यंत फूल बाजारात बदल होणार नाही, असे येथील एका फूल उत्पादक शेतकऱ्याने सांगितले.

राज्य शासनाने नुकताच प्लॅस्टिक व कृत्रिम फुलांवरील बंदीचा निर्णय घेतला होता. मात्र, या निर्णयाची अंमलबजावणी झालेली दिसत नाही. हा निर्णय चांगला होता मात्र त्याची अंमलबजावणी न झाल्याने त्याचा फायदा नैसर्गिक फूल उत्पादक शेतकरी, व्यापारी व विक्रेते यांना होत नाही.
- नितीन झगडे, फूल व्यापारी, बारामती कृषी उत्पन्न बाजार समिती बारामती

बाजार समितीतील (सोमवार, ता. ४ ऑगस्ट २०२५)
समितीतील फुलांचे सरासरी दर (किलोमध्ये )
झेंडू........२२ रुपये
गुलछडी........७० रुपये
बोर्डेक्स तुकडा ........५५ रुपये
पासली........२६ रुपये
भाग्यश्री व्हाइट........५० रुपये
पर्पल शेवंती........१३० रुपये