एकात्मिक फलोत्पादन विकास अभियान ; ड्रॅगन फ्रुट, पॅशन फ्रुट, स्ट्रॉबेरी लागवडीसाठी अनुदान

ड्रॅगन फ्रूट, स्ट्रॉबेरीसाठी अनुदान मिळविण्याची संधी

महाडीबीटी पोर्टलवर ऑनलाइन अर्ज करून लाभ घेण्याचे कृषी विभागाचे आवाहन

काटेवाडी, ता. ८ : शेतकऱ्यांना ड्रॅगन फ्रूट, पॅशन फ्रूट आणि स्ट्रॉबेरी लागवडीसाठी एकात्मिक फलोत्पादन विकास अभियानांतर्गत अनुदान मिळवण्याची संधी आहे. महाराष्ट्र शासनाच्या महाडीबीटी पोर्टलवर ऑनलाइन अर्ज करून शेतकरी या योजनेचा लाभ घेऊ शकतात. यंदा प्रथम अर्ज, प्रथम प्राधान्य तत्त्वानुसार अर्ज मंजूर होणार असून, शेतकऱ्यांना कागदपत्रे सादर करण्यापासून अनुदान वितरणापर्यंतची प्रक्रिया सुलभ केली आहे, अशी माहिती कृषी विभागातर्फे देण्यात आली.

शेतकऱ्यांनी https://mahadbt.maharashtra.gov.in या संकेतस्थळावर जाऊन ड्रॅगन फ्रूट, पॅशन फ्रूट किंवा स्ट्रॉबेरी लागवडीसाठी अर्ज करावा. यंदा २०२५-२६ साठी "प्रथम अर्ज, प्रथम प्राधान्य" ही कार्यपद्धती अवलंबली जाणार आहे, अशी माहिती कृषी विभागाने दिली आहे. निवड झालेल्या शेतकऱ्यांना त्यांच्या नोंदणीकृत मोबाइलवर संदेश प्राप्त होईल. त्यानंतर सात दिवसांत बँक खाते तपशील, हमीपत्र आणि इतर कागदपत्रे पोर्टलवर अपलोड करावी लागतील. कागदपत्रांची छाननी मंडळ कृषी अधिकारी करून तालुका कृषी अधिकाऱ्यांना शिफारस करतील. तालुका कृषी अधिकारी ऑनलाइन प्रणालीद्वारे पूर्वसंमती पत्र देतील. पूर्वसंमती मिळाल्यावर शेतकऱ्यांना १५ दिवसांत लागवड सुरू करावी लागेल आणि काम पूर्ण झाल्यावर देयके अपलोड करावी लागतील. मंडळ कृषी अधिकारी आठ दिवसांत प्रकल्पस्थळी जाऊन तपासणी करून अहवाल सादर करतील. त्यानंतर तालुका कृषी अधिकारी आणि जिल्हा अधीक्षक कृषी अधिकारी यांच्या शिफारसीनुसार ''सॅन स्पर्श'' प्रणालीद्वारे अनुदान वितरित होईल. यासाठी शेतकऱ्यांनी नजीकच्या तालुका कृषी कार्यालयाशी संपर्क साधावा, असे आवाहन करण्यात आले आहे.

अनुदानाची अशी असेल रक्कम
स्ट्रॉबेरी
सर्वसाधारण क्षेत्रासाठी – ४० टक्के,
अधिसूचित क्षेत्रासाठी- ५० टक्के
२ हप्त्यांमध्ये - ६०:४०
क्षेत्रमर्यादा : २ हेक्टरपर्यंत

ड्रॅगन फ्रूट, पॅशन फ्रूट, किवी, द्राक्ष :
सर्वसाधारण क्षेत्रासाठी – ४० टक्के
अधिसूचित क्षेत्रासाठी-५० टक्के,
२ हप्त्यांमध्ये - ६०:४०
दुसऱ्या वर्षी ८० झाडे जिवंत असावीत.
क्षेत्रमर्यादा - २ हे. पर्यंत

इच्छुक शेतकऱ्यांनी तालुका कृषी कार्यालयाशी संपर्क साधून आपले अर्ज भरावेत. अर्ज आल्यानंतर एकात्मिक फलोत्पादन विकास अभियानाच्या जिल्ह्याच्या आराखड्यामध्ये पाठवण्यात येतील. मंजुरी मिळाल्यानंतर शेतकऱ्यांना योजनेचा लाभ देण्यात येईल.
- टी. के. चौधरी, उपविभागीय कृषी अधिकारी बारामती