भाऊसाहेब फुंडकर योजनेसाठी दोन कोटींचा निधी

काटेवाडी, ता. १३ : अनुसूचित जातीतील शेतकऱ्यांना फळबाग लागवडीसाठी आर्थिक आधार देणारी भाऊसाहेब फुंडकर योजना २०२५-२६ मध्ये अधिक गतीने राबवली जाणार आहे. यासाठी दोन कोटी ४० लाख रुपयांचा निधी उपलब्ध करून देण्याचा निर्णय महाराष्ट्र शासनाने घेतला आहे. मागील वर्षांतील थकीत अनुदान पूर्ण करून नवीन शेतकऱ्यांना अनुदान मिळणार आहे. तसेच मागील दोन वर्षाच्या थकीत अनुदानाचा प्रश्न देखील या निर्णयामुळे निकाली निघण्याची चिन्हे निर्माण झाली आहेत.

राज्यातील अनुसूचित जाती आणि नवबौद्ध शेतकऱ्यांना फळबाग लागवडीसाठी प्रोत्साहन देणारी भाऊसाहेब फुंडकर फळबाग लागवड योजना सन २०२५-२६ मध्ये राबवली जाणार आहे. महाराष्ट्र शासनाने यासाठी कृषी आयुक्तालय, पुणे यांना २ कोटी ४० लाख रुपये अर्थसंकल्पीय वितरण प्रणालीद्वारे उपलब्ध करून दिले आहेत. यामुळे शेतकऱ्यांना फळबाग लागवडीद्वारे शाश्वत उत्पन्नाचा स्रोत निर्माण करण्यास मदत होईल.

प्रलंबित अनुदानाला प्राधान्य
या योजनेअंतर्गत प्रथम सन २०२३-२४ आणि २०२४-२५ मधील थकीत अनुदान पूर्ण करण्यात येणार आहे. त्यानंतर उर्वरित निधी २०२५-२६ मधील नवीन लाभार्थ्यांसाठी अनुदान वितरणासाठी वापरला जाईल. यामुळे मागील वर्षांतील लाभार्थ्यांना दिलासा मिळेल आणि नवीन शेतकऱ्यांना योजनेचा लाभ घेता येईल. सहायक संचालक (लेखा-१), कृषी आयुक्तालय, पुणे यांना निधी आहरण आणि वितरणाची जबाबदारी देण्यात आली आहे, तर आयुक्त (कृषी) यांना नियंत्रण अधिकारी म्हणून नियुक्त करण्यात आले आहे. निधीचा वापर करताना काटकसरीचे उपाय आणि शासकीय नियमांचे काटेकोर पालन करण्याच्या सूचना देण्यात आल्या आहेत.

अहवाल सादर करण्याचे निर्देश
निधीचा वापर आणि योजनेच्या प्रगतीबाबत प्रत्येक महिन्याच्या १० तारखेपर्यंत अहवाल सादर करण्याचे निर्देश क्षेत्रीय अधिकाऱ्यांना देण्यात आले आहेत. यामध्ये खर्चाचा तपशील, भौतिक उद्दिष्टे आणि निधी उपयोगिता प्रमाणपत्राचा समावेश असेल. हा अहवाल सामाजिक न्याय व विशेष सहाय्य विभाग आणि कृषी विभागाला पाठवला जाईल.
-----------------------------------