बारमतीतील ७५ मुलींना आज मिळणार मोफत सायकल

काटेवाडी, ता. १४ ग्रामीण भागात शाळेपासून दूर राहणाऱ्या मुलींच्या शिक्षणाच्या स्वप्नांना सायकलच्या चाकांवर गती देण्यासाठी पंचायत समिती बारामतीने ‘सायकल बँक’ ही अनोखी संकल्पना प्रत्यक्षात आणली आहे. पुणे जिल्हा परिषदेच्या ‘सायकलचा आधार, भविष्याला आकार’ या हृदयस्पर्शी उपक्रमांतर्गत शुक्रवारी (ता. १५) बारामती पंचायत समिती येथे तालुक्यातील ७५ गरजू मुलींना मोफत सायकली वाटप केल्या जाणार आहेत. इयत्ता ५ वी ते ७ वी मध्ये शिकणाऱ्या या मुलींसाठी ही सायकल केवळ वाहन नाही, तर त्यांच्या शिक्षणाच्या प्रवासातील एक विश्वासाचा आधार आहे. पंचायत समितीचे गटविकास अधिकारी किशोर माने म्हणाले की, हा उपक्रम मुलींच्या शिक्षणाला प्रोत्साहन देण्यासाठी आहे. समाजातील प्रत्येकाने यात सहभागी होऊन मुलींच्या उज्ज्वल भविष्यासाठी योगदान द्यावे. या उपक्रमामुळे ग्रामीण भागातील विद्यार्थिनींचा शाळेपर्यंतचा प्रवास सुखकर होईल, असे त्यांनी नमूद केले.