शासकीय खरेदीसाठी ई- पीक पाहणी अनिवार्य

काटेवाडी, ता. ७ ः केंद्र सरकारच्या आधारभूत किंमत खरेदी योजनेअंतर्गत हंगाम २०२५- २६ मध्ये कडधान्ये आणि तेलबियांची खरेदी नाफेडच्या माध्यमातून पणन महासंघामार्फत होणार आहे. यासाठी शेतकऱ्यांचा सातबारा उतारा आणि त्यावर ई- पीक पाहणी नोंद असणे अनिवार्य आहे. याबाबत बारामती बाजार समितीचे सभापती विश्वास आटोळे आणि उपसभापती रामचंद्र खलाटे यांनी शेतकऱ्यांना मुदतीत ई- पीक पाहणी पूर्ण करण्याचे आवाहन केले आहे.
कडधान्ये आणि तेलबियांच्या खरेदीमध्ये मूग, उडीद, मका, तूर आणि सोयाबीन यांचा समावेश आहे. ही खरेदी प्रक्रिया पारदर्शक, कार्यक्षम आणि पूर्णपणे ऑनलाइन पद्धतीने राबविली जाणार आहे. शेतकऱ्यांच्या हितासाठी ही योजना प्रभावीपणे राबविण्याचे निर्देश जिल्हा पणन अधिकाऱ्यांनी दिले आहेत. बारामती बाजार समितीच्या आवारात दरवर्षी शासकीय खरेदी केंद्र सुरू केले जाते, ज्याचा लाभ बारामतीसह पुणे जिल्ह्यातील शेतकऱ्यांना होतो.
शासकीय खरेदी योजनेचा लाभ घेण्यासाठी सातबाऱ्यावर ई- पीक पाहणी नोंद असणे गरजेचे आहे. यामुळे खरेदी प्रक्रियेत कोणतीही अडचण येणार नाही, असे बाजार समितीचे सचिव अरविंद जगताप यांनी सांगितले.