कृषी औजारांसाठीची १ लाखाची मर्यादा रद्द

काटेवाडी, ता. ७ : कृषी यांत्रिकीकरण उपअभियान, राज्यपुरस्कृत कृषी यांत्रिकीकरण आणि राष्ट्रीय कृषी विकास योजनेअंतर्गत (DPR) शेतकऱ्यांना औजारे खरेदीसाठी असलेली एक लाखाची अनुदान मर्यादा काढून टाकण्यात आली आहे. याबाबत मंगळवारी (ता.७) पत्र जारी करण्यात आले आहे. शेतकऱ्यांना आता निवड झालेल्या सर्व घटकांसाठी एका वर्षात अनुदान मिळणार आहे. यामुळे शेतकऱ्यांना आधुनिक शेती साधने घेणे सुलभ होण्याची अपेक्षा आहे.
वैयक्तिक लाभार्थ्यांना ट्रॅक्टर वगळता औजारे खरेदीसाठी एका वर्षात ३ ते ४ औजारे किंवा १ लाख रुपये अनुदान मर्यादेच्या आत येणारी औजारे घेण्याची अट होती. तसेच, १ लाखापेक्षा जास्त अनुदान असलेल्या औजारासाठी केवळ एकाच औजाराला अनुदान मिळत होते. आता ही एक लाखाची मर्यादा हटवण्यात आली आहे. मात्र, एकाच घटकासाठी अनुदानाची पुनरावृत्ती होणार नाही, याची दक्षता घ्यावी लागेल, असे कृषी आयुक्तालयाने नमूद केले आहे. यामुळे शेतकऱ्यांना आधुनिक शेतीसाठी लागणारी यंत्रसामग्री आणि सुविधा उपलब्ध होण्यास मदत होईल. हे पत्र कृषी अभियांत्रिकी संचालनालयाचे संचालक अंकुश माने यांनी जारी केले आहे.