दौंड तालुका निवड चाचणी कुस्ती स्पर्धा गुरुवारपासून

खुटबाव, ता. ७ : पिंपळाची वाडी खोर (ता. दौंड) येथे गुरुवारपासून (ता. ९) दौंड तालुका निवड चाचणी कुस्ती स्पर्धा व दौंड मल्ल सम्राट स्पर्धेचे आयोजन करण्यात आले आहे. पुणे जिल्हा कुस्तीगीर तालीम संघाच्या वतीने व दौंड तालुका कुस्तीगीर तालीम संघाच्या मान्यतेने आयोजन करण्यात आल्याची माहिती संयोजक ज्ञानेश्‍वर चौधरी व सागर चौधरी यांनी दिली. महाराष्ट्र केसरी किताब स्पर्धा या गट ८६ किलो ते १२५ किलो वजन गटामध्ये पार पडल्या जाणार आहेत. वजन गट २५, २८, ३२, ३६, ४०, ४४, ४८, ५१, ५५, ६० किलो मधील बाल गटाच्या कुस्त्या या फक्त पुणे जिल्हा स्तरापर्यंत होणार आहेत. वजन गट ५७, ६१, ६५, ७०, ७४, ७९, ८६, ९२ या वजन गटांमधील कुस्ती स्पर्धा महाराष्ट्र केसरी वरिष्ठ वजन गट गादी व माती विभागावरील पार पडणार आहेत. या स्पर्धेला दौंडचे आमदार राहुल कुल, ट्रिपल महाराष्ट्र केसरी विजय चौधरी, महाराष्ट्र राज्य कुस्तीगीर संघाचे कार्याध्यक्ष पैलवान संदीप भोंडवे, पुणे जिल्हा कुस्तीगीर तालीम संघाचे अध्यक्ष पैलवान मेघराज कटके, हिंद केसरी व महाराष्ट्र पैलवान अभिजित कटके उपस्थित राहणार आहेत.