देलवडीत पाच लाखांची कोथिंबीर ‘व्हेंटिलेटरवर’

खुटबाव, ता.२५ : एकथेंबी पावसाने देलवडी (ता. दौंड) येथील शेतकरी योगेश भोसले यांच्या पावणेतीन एकर क्षेत्रामध्ये पाणीच पाणी साचल्याने पाच लाख रुपये किमतीचे कोथिंबिरीचे पीक व्हेंटिलेटरवर आले आहे. आगामी दोन तीन दिवस पाऊस झाल्यास या पिकाचे सर्वस्वी नुकसान होणार आहे.

आठवड्यापूर्वी एका खासगी व्यापाऱ्याने शेतीच्या बांधावरच एक एकर कोथिंबिरीचा एक लाख ८० हजार रुपये किमतीला मागणी केली होती. त्यानंतर पाऊस सुरू झाल्याने भोसले यांच्या शेतातील कोथिंबिरीचे पीक तोडणे अवघड झाले आहे. सध्या बाजारामध्ये कोथिंबिरीच्या जुडीला २५ ते ३० रुपये बाजारभाव आहे. दिवसभर पाऊस कोसळत असल्याने भोसले यांच्या शेतातील कोथिंबीर बाहेर काढणे जिकिरीचे झाले आहे. मजुराला १०० कोथिंबिरीच्या जुडीला काढण्यासाठी ८० रुपये दिले जातात. या मजुरांना प्रतिशेकडा ३०० रुपये देण्याचे कबूल करून सुद्धा संततधार पावसाने मजूर उपलब्ध होत नसल्याची वस्तुस्थिती आहे.

भोसले यांनी केलेला एक लाख १४ हजारांचा खर्च (रुपयांत)
रेन पाइप.....४५ हजार
ट्रॅक्टर मेहनत.....१८ हजार
धना बी......२७ हजार
औषधे फवारणी ....१८ हजार
खते....६ हजार

गेली २० वर्षापासून शेती व्यवसाय करतो. संपूर्ण आयुष्यामध्ये मे महिन्यामध्ये प्रथमच एवढा मोठा हंगामपूर्व पाऊस अनुभवला. गेली चार वर्षापासून दरवर्षी वर्षापासून दरवर्षी न चुकता वर्षापासून दरवर्षी न चुकता कोथिंबिरीचे पीक घेतो. चालू वर्षी पावसाने संभाव्य पाच लाखांचे उत्पन्न असणारे कोथिंबिरीचे पीक अंतिम घटका मोजत आहे. अपेक्षा करतो की, आता तरी पाऊस थांबावा, उरलेसुरलेले पीक हातामध्ये यावे.
- योगेश भोसले, कोथिंबीर उत्पादक

02458