भीमा नदीवरील ढापे काढण्यास सुरुवात

खुटबाव, ता. २० ः पारगाव ग्रामस्थांच्या प्रसंगावधानामुळे पारगाव (ता. दौंड) येथील भीमा नदीच्या पात्रातील कोल्हापूर पद्धतीच्या बंधाऱ्याचे ढापे व जलपर्णी काढण्यास सुरुवात झाली आहे.
पारगाव ग्रामस्थांनी जलपर्णी अडकल्याने व ढापे न काढल्याने बंधाऱ्याच्या भरावास होणाऱ्या संभाव्य धोक्याबाबत आमदार राहुल कुल यांना कल्पना दिली. त्यानंतर आमदार कुल यांनी पाटबंधारे विभागाला ढापे व जलपर्णी काढण्याचे आदेश दिले. चालू वर्षी मे महिन्यामध्ये जास्त पाऊस झाल्याने भीमा नदीला गेली २० दिवस पूरसदृश परिस्थिती आली आहे. नदीपात्रातील पाणी वाढल्याने कोल्हापूर पद्धतीच्या बंधाऱ्याचे ढापे काढणे अवघड बनले होते. ढापे न काढल्याने नदीपात्रामध्ये पाण्याचा फुगवटा जास्त होत होता. याचा फटका नदी पात्राशेजारील शेतजमिनीला बसल्याचे चित्र होते. यामुळे लगतच्या शेतजमिनीमध्ये पाणी पसरले होते. सध्या पडत असलेल्या पावसामुळे पुराचा धोका लगतच्या शेतजमिनीला आणि बंधाऱ्याला होता. यामुळे बंधाऱ्याचा भराव वाहून जाण्याची शक्यता होती.
संबंधित धोक्याबद्दल पारगावचे माजी तंटामुक्ती अध्यक्ष ॲड. वैभव बोत्रे यांनी सोमवारी (ता. १६) रात्री आमदार कुल यांना फोनवरून यासंदर्भात कल्पना दिली. यावर आमदार कुल यांनी त्वरित पाटबंधारे खात्याच्या अधिकाऱ्यांना कार्यवाही करण्याचे आदेश दिले. त्यानंतर मंगळवारी (ता. १७) सकाळी ८ वाजता पाटबंधारे खात्याचे अधिकारी सुहास साळुंके व स्नेहल शेलार हे मोठे पोकलेन मशिन घेऊन भीमा नदीकाठी हजर झाले. त्यानंतर दिवसभर पोकलेनच्या साहाय्याने बंधाऱ्यात अडकलेली जलपर्णी आणि कडेच्या गाळ्यांचे ढापे काढून पाण्यास वाट करून दिली. यावेळी भानुदास शिंदे, सतीश शिंदे, सारंग कुंभार, विशाल ताकवणे, विशाल शिंदे, अक्षय शिंदे, प्रशांत ताकवणे आदी ग्रामस्थ उपस्थित होते.