नानगाव येथे फुलला वैद्यकीय सेवेचा मळा

प्रकाश शेलार : सकाळ वृत्तसेवा
खुटबाव, ता.३० : नानगाव (ता. दौंड) हे भीमा नदीकाठी वसलेले गाव. गावची लोकसंख्या ५००० असून शेती हा मुख्य व्यवसाय आहे. एकविसाव्या शतकाच्या सुरुवातीस शेतकरी कुटुंबातील डॉ. भरत खळदकर‌ व डॉ. श्रीराम मोटे हे गावातील पहिले डॉक्टर झाले. गावातील न्यू इंग्लिश स्कूल प्राथमिक शाळेत शिक्षण घेतलेले ३८ तरुणी-तरुणी डॉक्टर आहेत.मुळे गावात वैद्यकीय सेवेचा मळा फुलला आहे.

पुणे जिल्ह्यातील डॉक्टरांचे गाव म्हणून नानगाव नावारूपास आले आहे. विशेष म्हणजे‌ वर्षानुवर्षे राजकारणामध्ये मातब्बर असणाऱ्या शेतकरी कुटुंबातील पुढील पिढी मात्र डॉक्टर बनली आहे. एकेकाळी नानगाव गाव हे प्रगतशील शेतकऱ्यांचे गाव म्हणून प्रसिद्ध होते. या गावांमध्ये अनेक कुटुंबांचा सातबारा हा प्रत्येकी १०० एकरापेक्षा जास्त आहे. शेती हा मुख्य व्यवसाय होता. वर्षानुवर्षे राजकारणात ही कुटुंबे प्रस्थापित कुटुंबे म्हणून ओळखली जायची. एकत्र कुटुंबातील एखादा व्यक्ती शिकून नोकरी लागल्यास त्याला विशेष मान मिळण्यास सुरुवात झाली. न्यू इंग्लिश स्कूल नानगाव शाळेचे हुशार विद्यार्थी भरत खळदकर यांना स्वर्गीय आमदार सुभाष अण्णा कुल, चुलते भिकोबा खळदकर, डी.के. खळदकर यांनी डॉक्टर होण्याचा सल्ला दिला. ते २००३ मध्ये एम.डी. झाले. त्यानंतर गावातील अनेक एकत्र कुटुंबातील नवयुवक तरुण व तरुणींनी डॉक्टरकीचा मार्ग पत्करला. गावातील डॉ. विशाल खळदकर, डॉ. अनिकेत खळदकर हे एम.डी‌ झालेले आहेत.तर शुभम मोटे, गायत्री खळदकर,अमिता खळदकर, प्रतीक दिवेकर, गायत्री गुंड, सागर गुंड, योगेश गुंड, प्रतीक खळदकर हे एमबीबीएस झाले आहेत. पांडुरंग शेलार व पार्थ शेलार ही भावंडे एम. एस. झाली आहेत.यामध्ये भीमा पाटसचे माजी संचालक डी.के.खळदकर यांच्या कुटुंबामध्ये आठ, माजी सरपंच राजकुमार मोटे यांच्या कुटुंबामध्ये पाच, भीमा पाटसचे संचालक आबासाहेब खळदकर यांची दोन अपत्ये, भीमा पाटसचे माजी संचालक नारायण गुंड यांच्या कुटुंबामध्ये तीन‌ तर शिक्षक विठ्ठल गुंड‌ व वकील पांडुरंग शेलार यांची दोन अपत्ये डॉक्टर आहेत. एकूणच गेल्या वीस वर्षातील नानगावचे डॉक्टरकीकडे स्वप्नवत स्थित्यंतर झाले आहे.

पुणे जिल्ह्यातील सर्वात मोठी असणारी नानगाव पाणीपुरवठा संस्था नानगावमध्ये सुरू झाली. तेव्हापासून नानगाव हे शेतकऱ्यांची गाव म्हणून प्रसिद्ध झाले. मधल्या काळामध्ये गावातील अनेक युवक युवती शिक्षक म्हणून नोकरीला लागले. काळानुरूप बदल होत आज नानगावच्या युवक युवतींचा ओढा हा डॉक्टरकीकडे आहे. शेतकरी कुटुंबातील बहुतांशी डॉक्टर असल्याने ही बाब आमच्यासाठी अभिमानास्पद आहे.
- डॉ. भरत खळदकर, ग्रामस्थ, नानगाव(ता. दौंड)