रमेश थोरात हाती घड्याळ बांधण्याच्या तयारीत अजित पवार यांच्या उपस्थितीत पक्षप्रवेश करण्याच्या हालचाली सुरू
खुटबाव, ता. १७ ः नुकत्याच झालेल्या विधानसभा निवडणुकीत राष्ट्रवादी काँग्रेस शरदचंद्र पवार पक्षाकडून निवडणूक लढवलेले दौंडचे माजी आमदार रमेश थोरात यांनी पुन्हा घड्याळ हाती बांधण्याची तयारी सुरू केली आहे. पुणे जिल्ह्यातील माजी आमदार संग्राम थोपटे, संजय जगताप यांच्या भाजप प्रवेशानंतर थोरात यांचा होणारा राष्ट्रवादी काँग्रेस प्रवेश महाविकास आघाडीला धक्का देणारा आहे. शिरूर हवेलीची माजी आमदार अशोक पवार यांनी मात्र आपण पक्षातच समाधानी असल्याचे सांगितले.
या संभाव्य प्रवेशासंदर्भात थोरात हे खासगीत कार्यकर्त्यांशी चर्चा करत आहेत. दौंड तालुक्यातील मध्यवर्ती ठिकाणी लवकरच मेळावा घेऊन अजित पवार यांच्या उपस्थितीत थोरात यांनी राष्ट्रवादी काँग्रेसमध्ये प्रवेश करण्याची तयारी सुरू केली आहे. उपमुख्यमंत्री अजित पवार यांचे ते विश्वासू सहकारी आहेत. २०२४ मध्ये झालेल्या लोकसभा निवडणुकीमध्ये रमेश थोरात यांनी आमदार राहुल कुल यांच्याबरोबर खासदार सुनेत्रा पवार यांचे काम केले. त्यानंतर झालेल्या विधानसभा निवडणुकीमध्ये महायुतीकडून आमदार राहुल कुल यांना तिकीट मिळाले. त्यामुळे निवडणुकीच्या तोंडावर थोरात यांनी राष्ट्रवादी काँग्रेस शरदचंद्र पवार पक्षामध्ये प्रवेश करत विधानसभा निवडणूक लढवली होती. आगामी होणाऱ्या स्थानिक स्वराज्य संस्था व पुणे जिल्हा मध्यवर्ती बँक या निवडणुकांच्या पार्श्वभूमीवर अजित पवार यांच्याकडून थोरात यांना प्रवेशासंदर्भात आग्रह होत आहे. त्यामुळे रमेश थोरात लवकरच प्रवेश करतील, अशी चर्चा तालुक्यात चालू आहे. थोरात यांचे चिरंजीव तुषार थोरात राष्ट्रवादी काँग्रेसकडून आगामी जिल्हा परिषद निवडणूक लढवणार आहेत. तसेच स्वतः जिल्हा बँक निवडणूक लढवणार असल्याने अजित पवार यांचा पाठिंबा थोरात यांच्यासाठी महत्त्वपूर्ण ठरणार आहे.
या संदर्भात रमेश थोरात म्हणाले की, मला प्रवेशाची चर्चा समाज माध्यमांकडून ऐकण्यास मिळत आहे. अजित पवार हे माझे मार्गदर्शक असल्याने अनेकदा त्यांच्याकडे कामांसाठी जाण्याचा योग्य येतो. भविष्यात एखादा निर्णय घ्यायचा झाल्यास कार्यकर्त्यांना विश्वासात घेतले जाईल.
मी पक्ष सोडणार नाही ः अशोक पवार
रमेश थोरात व अशोक पवार यांची मैत्री सर्वश्रुत आहे. दोघेही अनेक राजकीय निर्णय एकत्रितपणे घेतात. थोरात यांच्या संभाव्य प्रवेशामुळे पवार यांची भूमिका जाणून घेण्याचा प्रयत्न केला. यावेळी अशोक पवार म्हणाले की, गेल्या ४० वर्षापासून ज्येष्ठ नेते शरद पवार यांचा मी निष्ठावंत कार्यकर्ता आहे. मला कोणाकडूनही पक्षप्रवेशाची ऑफर आलेली नाही.अद्याप माझा तसा विचारही नाही.
फोटो ः 02661
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.