नानगाव येथे बिबट्या जेरबंद

खुटबाव, ता. ८ : नानगाव (ता. दौंड) परिसरातील आमोणीमाळ येथे रानटी प्राण्यांसाठी लावण्यात आलेल्या लोखंडी सापळ्यामध्ये मादी बिबट्या अडकला होता. या संदर्भात वन विभागाने पुणे येथील ‘रेस क्यू टीम’ पथकाला माहिती दिली. एका तासाच्या अथक प्रयत्नानंतर पथकाने बिबट्याला जेरबंद केले. पुढील उपचारासाठी या बिबट्याला वन्यप्राणी उपचार केंद्र बावधन येथे हलविण्यात आले.
गुरुवारी (ता.७) रात्री सोनबा ढमे यांच्या शेतातील लोखंडी सापळ्यामध्ये हा बिबट्या अडकला. तर, शुक्रवारी सकाळच्या सुमारास गावातील लोक शेतामध्ये आले असता त्यांना बिबट्या दिसला. वनविभागाने या संदर्भात तात्काळ ‘रेस क्यू टीम’ पथकाला माहिती दिली. दोन तासांत पथक नानगाव येथे हजर झाले. बिबट्याला भूलीचे इंजेक्शन दिल्यानंतर त्याच्या पायातील फासा काढून त्याला जेरबंद करण्यात आले. यावेळी वनपरिक्षेत्र अधिकारी राहुल काळे, पोलिस पाटील पोपट लव्हे, शोभा खळदकर, वनपाल योगिता वीर, अंकुश खरात, वनरक्षक गणेश मस्के, सोनाली राठोड, वनमजूर भरत शितोळे, पुण्यातील ‘रेस क्यू टीम’ पथकाचे नचिकेत अवधानी व सहकारी उपस्थित होते. बिबट्या पाहण्यासाठी स्थानिकांसह आजूबाजूच्या गावातील लोकांनी गर्दी केली होती. त्यामुळे मुख्य रस्त्यावर वाहतूक ठप्प झाली. पोलिस हवालदार एन. डी. जाधव व पी. एस. म्हस्के यांनी गर्दी हटविण्याचे काम पाहिले.