देलवडीत अण्णा भाऊ साठेंच्या कार्याला उजाळा

खुटबाव, ता. १९ : देलवडी (ता. दौंड) येथे साहित्यरत्न लोकशाहीर अण्णा भाऊ साठे यांच्या १०५ व्या जयंतीनिमित्त गायक अजय क्षीरसागर यांचे गायन झाले. यावेळी क्षीरसागर यांनी आपल्या गायनातून अण्णांच्या कविता, लोकनाट्य, गीते, कादंबऱ्या, जीवनचरित्र अत्यंत प्रभावीपणे मांडले. त्यांच्या लेखणीतील रानगंगा, माकडीचा माळ, फकीरा, वारणेचा वाघ, चिखलातील कमळ अशा कादंबऱ्यांचा तसेच अण्णांच्या कार्याचा आढावा १५ कलावंत सहकाऱ्यांसोबत उपस्थित ग्रामस्थांसमोर मांडला. दौंडचे माजी आमदार रमेश थोरात व माजी आमदार रंजना कुल यांनी उपस्थित राहून शुभेच्छा दिल्या. यावेळी भीमा पाटस कारखान्याचे संचालक विकास शेलार, शिवाजी वाघोले, सुभाष गायकवाड उपस्थित होते. अण्णाभाऊ साठे मित्र मंडळाचे सदस्य विजय नेटके, राजेंद्र अढागळे, तात्या काळे, राजू अढागळे, नितीन आढागळे आदींनी संयोजन केले.