पारगावात तुकाईदेवी मंदिरात गर्दी

खुटबाव, ता. २९ : पारगाव (ता. दौंड) येथे नवरात्र उत्सवानिमित्त तुकाईदेवी मंदिरात भाविकांची दर्शनासाठी गर्दी होत आहे. राज्यातून भाविक तुकाईदेवीच्या दर्शनासाठी येत आहेत. नवरात्र उत्सवानिमित्त वेगवेगळ्या कार्यक्रमाचे आयोजन करण्यात आल्याची माहिती तुकाई देवस्थान ट्रस्टचे अध्यक्ष अरुण बोत्रे यांनी दिली. यावेळी महादेव ताकवणे, दत्तात्रेय शितोळे, गणेश भालेराव, दीपक शिशुपाल, रामचंद्र भालेराव आदी पदाधिकारी उपस्थित होते. नवरात्रानमित्त मंदिर परिसरामध्ये सायंकाळी दररोज ढोल लेझीम पथकाचा कार्यक्रम, त्यानंतर रात्री ९.०० वाजता आरती होत आहे. मंदिर परिसरात महिलांनी तुकाईदेवीची प्रतिकृती असलेली रांगोळी साकारली आहे. मंदिराला विद्युत रोषणाई करण्यात आली आहे. उत्सवानिमित्त गावातील प्रत्येक कुटुंबामध्ये एका भाविकाने १० दिवस देवीचा उपवास धरला आहे. गावातील ५० भाविकांनी मंदिर परिसरामध्ये १० दिवस देवीचा उपवास धरून मुक्काम केला आहे. या भाविकांना फराळ देण्याचे काम ग्रामस्थ करत आहेत.
घट उठवताना सर्व भाविकांचा उपवास सोडला जातो. दसऱ्याच्या मुहूर्तावर देवीचा छबिना निघतो.