देलवडी परिसरात चोरट्यांचा धुमाकूळ

खुटबाव, ता. ९ : देलवडी (ता. दौंड) येथे चोरट्यांनी केलेल्या धारदार शस्त्राच्या हल्ल्यामध्ये ग्रामस्थ काका गायकवाड प्रसंगावधानामुळे बचावले. ही घटना गुरुवारी (ता. ९) मध्यरात्रीच्या सुमारास घडली. रात्री दीडच्या सुमारास गायकवाड यांच्या घरासमोर पाच चोर आले असता त्यांनी दार वाजवले. गायकवाड यांनी घरातील कडी खोलून दार उघडण्याचा प्रयत्न केला असता चोरट्याने धारदार शस्त्राने त्यांच्यावर वार केला. प्रसंगावधान राखत गायकवाड यांनी पुन्हा दाराची कडी लावून घेतली. त्यानंतर चोरट्यांनी आपला मोर्चा शेजारील सुरेश भालेराव यांच्या घराकडे वळवला. भालेराव यांच्या घराचा कडी कोयंडा तोडून चोरट्यांनी तीन हजार रुपये लंपास केले. त्यानंतर एक तासाने गावातील दत्ता करे यांच्या घरातील १२ हजार रुपये व मोबाईल त्यांनी चोरला. याचबरोबर पहाटेच्या दरम्यान नाथाचीवाडी येथील एक दुचाकी चोरीला गेली आहे. यावेळी चोरट्यांनी प्रवासासाठी तीन दुचाकींचा वापर केल्याचे गावातील एका हॉटेलच्या सीसीटीव्ही कॅमेऱ्यामध्ये कैद झाले आहे. रात्री उशिरापर्यंत यवत पोलिस ठाण्यामध्ये गुन्हा नोंदविण्याचे काम सुरू होते.