खामगावात दाखविले विज्ञान विषयक चित्रपट

खुटबाव, ता. ८ : खामगाव (ता. दौंड) येथे ज्ञानराज स्कूलमध्ये विद्यार्थ्यांमध्ये विज्ञानाविषयी आवड निर्माण करण्याच्या उद्देशाने विज्ञान विषयक विशेष चित्रपट प्रदर्शन आयोजित करण्यात आले.
या कार्यक्रमात विद्यार्थ्यांना चंद्रयान-३, डायनोसोर विश्व, तसेच द शार्क- समुद्री जीवन या विषयांवरील माहितीपूर्ण चित्रपट दाखविण्यात आले. संस्थेचे अध्यक्ष महेंद्र जगताप म्हणाले की, चंद्रयान ३ या चित्रपटाद्वारे विद्यार्थ्यांना भारताच्या चांद्रयान मोहिमेची माहिती, इस्रोचे संशोधन व भारतीय शास्त्रज्ञांचे कार्य समजले. डायनोसोर या चित्रपटाने प्राचीन पृथ्वीचा इतिहास, ज्वालामुखी बदल, तसेच जीवसृष्टीचे उत्क्रांतीविषयक ज्ञान विद्यार्थ्यांना मिळाले. द शार्क या चित्रपटातून सागरी जीवन, प्रजातींतील विविधता व महासागरातील अन्नसाखळीची कल्पना विद्यार्थ्यांना स्पष्ट झाली. विद्यालयातील विज्ञान शिक्षकांनी विद्यार्थ्यांशी संवाद साधून विविध प्रश्नांची उत्तरे दिली आणि या कार्यक्रमाचे महत्त्व सांगितले. या सर्व चित्रपटांमुळे विज्ञानाविषयी कुतूहल, निरीक्षणशक्ती आणि अभ्यासाची आवड वाढल्याचे विद्यार्थ्यांनी सांगितले. यावेळी मुख्याध्यापिका सुमन मकवाना,संस्थेचे संचालक राजेंद्र जगताप, नितीन कुदळे व खजिनदार अनिल शिंगाडे उपस्थित होते.