पेन्शन जनक्रांती महामोर्चात जिल्ह्यातून कर्मचारी जाणार

खुटबाव, ता. १० : ‌महाराष्ट्र राज्य जुनी पेन्शन संघटनेच्या वतीने नागपूर येथील हिवाळी अधिवेशनाच्या पार्श्‍वभूमीवर शुक्रवारी (ता. १२) तरुण कर्मचाऱ्यांच्या वतीने आयोजित केलेल्या पेन्शन जनक्रांती महामोर्चात पुणे जिल्ह्यातील १० हजार कर्मचारी सहभागी होणार असल्याची माहिती पुणे जिल्हा जुनी पेन्शन संघटनेचे अध्यक्ष बबन म्हाळसकर यांनी दिली.
त्यांनी सांगितले की, संपूर्ण महाराष्ट्रातून ५२ केडरचे एक लाख कर्मचारी या आंदोलनास उपस्थित राहणार आहेत. सन २००५ नंतर जे कर्मचारी शासकीय सेवेत रुजू झाले, त्यांना सन १९८२- ८४ ची जुनी पेन्शन लागू करावी, या एकमेव मागणीसाठी हा पेन्शन क्रांती महामोर्चा होणार आहे. या मागणीसाठी महाराष्ट्र राज्य जुनी पेन्शन संघटनेच्या वतीने वेळोवेळी अनेक मोठमोठी आंदोलने व मोर्चे केले आहेत. त्याचे फलित म्हणून मयत कर्मचाऱ्यांना फॅमिली पेन्शन लागू केली आहे, परंतु शासनाने लादलेली एनपीएस/ यूपीएस या योजना अमान्य असल्याने या मोर्चाचे आयोजन केले आहे.