‘औद्योगिक रोजगारात स्थानिकांना प्राधान्य द्या’

कुरकुंभ, ता. ४ : कुरकुंभ (ता. दौंड) येथील पंचक्रोशी परिसरातील गरजवंत आणि शिक्षित तरुणांना स्थानिक औद्योगिक कंपन्यांनी रोजगाराची संधी उपलब्ध करून द्यावी, अशी मागणी सामाजिक कार्यकर्ते व रासायनिक कंपन्यांमुळे बाधित झालेल्या जमिनीचे मालक मोहनराव भोसले यांनी केली आहे. कुरकुंभ औद्योगिक क्षेत्रात मोठ्या प्रमाणात कारखाने असतानाही स्थानिक तरुणांना रोजगार मिळत नसल्याने बेरोजगारीची समस्या गंभीर झाली आहे. या पार्श्वभूमीवर भोसले यांनी महाराष्ट्र औद्योगिक उपविभागीय उपअभियंता कार्यालयाकडे लेखी निवेदन देत स्थानिकांना रोजगारात प्राधान्य द्यावे, अशी मागणी केली. स्थानिकांकडून वाढत्या तक्रारी लक्षात घेता, कंपन्यांनी स्थानिक आणि पात्र उमेदवारांना रोजगार देण्यासाठी सकारात्मक धोरण राबवावे, अशीही मागणी भोसले यांनी केली आहे