विद्युत वाहिनी कामात कंपनीची मनमानी

लोणी देवकर, ता. २३ ः बळपुडी व करेवाडी (ता. इंदापूर) येथील नव्याने उभा राहत असलेल्या सौर ऊर्जा प्रकल्पाची वीज तालुक्यातीलच लोणी देवकर येथील औद्योगिक वसाहतीकडे नेण्यासाठी उभे करण्यात येणाऱ्या विद्युत वाहिनीच्या कामात कंपनी मनमानी करत आहे. या मार्गावरील ग्रामस्थ आणि स्थानिकांच्या मागण्यांचा विचार न करता पैशाच्या बळावर स्थानिक शेतकऱ्यांसह उद्योजकांचेही नुकसान करत आहे. यामुळे या प्रकरणी वरिष्ठ अधिकाऱ्यांनी लक्ष घालून तत्काळ स्थानिकांचा विचार करून पुढील काम करण्यात यावे, अशी मागणी होत आहे.
याबाबत अधिक माहिती अशी की, शासनाच्या नवीन धोरणानुसार सौर ऊर्जेला प्राधान्य देण्यात येत आहे. या पार्श्वभूमीवर तालुक्यातील बळपुडी, करेवाडी व बाभूळगाव येथे खासगी कंपनीच्या माध्यमातून सौर ऊर्जा प्रकल्प उभा करण्यात येत आहेत. प्राथमिक टप्प्यात बळपुडी येथील सौर ऊर्जा प्रकल्पाचे काम पूर्णत्वाला आले असून, करेवाडी व बाभूळगाव येथील सौर ऊर्जा प्रकल्पाची कामे मध्यम स्तरावर आहेत. बळपुडी येथील पूर्ण झालेल्या सौर ऊर्जा प्रकल्पाची वीज लोणी देवकर येथील औद्योगिक वसाहतीला व्यावसायिक दृष्टिकोनातून पुरवण्यात येणार आहे.
यासाठी बळपुडी ते लोणी देवकर औद्योगिक वसाहत या पुणे- सोलापूर महामार्गावरील सेवा रस्त्याच्या बाजूने विद्युत वाहिनी टाकण्याचे काम सध्या सुरू आहे. मात्र, हे काम करत असताना ज्या भागातून ही विद्युत वाहिनी जात आहे, तसेच करेवाडी येथूनही लोणी देवकर औद्योगिक वसाहतीकडे विद्युत वाहिनीचे काम सुरू असताना स्थानिक शेतकऱ्यांचे ही मोठ्या प्रमाणावर नुकसान होत आहे. यामध्ये त्या भागातील स्थानिक नागरिक, शेतकरी व उद्योजक यांना विश्वासात न घेता संबंधित कंपनी बळजबरीने आणि पैशाच्या बळावर कायद्याला न जुमानता काम पुढे रेटून नेत आहे.
यामुळे स्थानिक नागरिक आणि संबंधित कंपनी यांच्यामध्ये वारंवार वाद उद्भवत असून, शुक्रवारी (ता. २०) स्थानिक ग्रामस्थ आणि कंपनीचे काम करणारे अधिकारी व कर्मचारी यांच्यामध्ये वाद विकोपाला गेला होता. इंदापूर पोलिस ठाण्यामध्ये याबाबत अदखलपात्र गुन्ह्याची नोंद करण्यात आली. तसेच यापुढेही हा वाद वाढण्याची शक्यता आहे. यामुळे याबाबत क्रीडामंत्री दत्तात्रेय भरणे यांनी लक्ष घालून कंपनीचे अधिकारी व स्थानिक ग्रामस्थ यांच्यामध्ये समन्वयातून मार्ग काढण्याची मागणी होत आहे. याबाबत संबंधित विभागाच्या अधिकाऱ्यांशी संपर्क साधण्याचा प्रयत्न केला असता तो होऊ शकला नाही.