इंदापुरात १३०० हेक्टरवर ‘साखर पेरणी’

लोणी देवकर, ता. १२ : इंदापूर तालुक्यामध्ये आडसाली ऊस लागवडीला वेग आला आहे. यंदा तालुक्यात सर्वदूर पाऊस झाल्याने १३०० हेक्टर उसाची लागवड पूर्ण झाली आहे. पुढील २ महिन्यात उच्चांकी १० हजार हेक्टर आडसाली ऊस लागवड होईल, असा अंदाज कृषी अधिकाऱ्यांनी व्यक्त केला आहे. तालुक्यात मे महिन्यातच झालेल्या पावसामुळे लागवडीस काहीसा उशिरा प्रारंभ झाला आहे.
सध्या पावसाने उघडीप दिल्याने शेतकरी शेतीकामात गुंतले आहेत. शेतकऱ्यांकडून शेतीच्या मशागती सुरू होऊन उसाच्या लागवडी देखील सुरू करण्यात आले आहे. आडसाली, पूर्वहंगामी व सुरू ऊस अशा तीन टप्प्यात उसाची लागवड केली जाते. शेतकरी साडेतीन फूट अंतरावरील सरी तसेच आधुनिक पट्टा पद्धतीने ऊस लागवडी करण्यावर भर देत आहेत. आडसाली ऊस लागवडीमध्ये कोएम-८६०३२, फुले-२६५ या ऊस बियाणांना लागवडीसाठी शेतकऱ्यांचे प्राधान्य दिसत आहे.
चालू वर्षी उसाच्या बेण्याचे बाजारभाव ३५०० रुपये प्रतिटन या दराने उसाचे बेणे खरेदी करण्याची वेळ शेतकरी वर्गावर आली आहे.आता सुरू असलेल्या लागवडी कोरडीला सुरू आहे. मजूर प्रतिएकर लागवडीसाठी सहा हजार रुपये घेत आहेत. खताचा खर्च देखील वाढलेला आहे. एकूण उसाच्या उत्पन्नाचा खर्च वाढल्यामुळे तंत्रशुद्ध व अधिक उत्पादन कसे निघून अधिकचा नफा कसा मिळवता येईल यावर शेतकऱ्यांचा भर असणार आहे.

एआय तंत्रज्ञानाची तयारी
काही शेतकरी रोपवाटिकेतून उसाचे रोप आणून लागवड करत आहेत आणि एआय पद्धतीने ऊस उत्पादन घेण्याच्या तयारीत आहेत. शेतकऱ्याकडून लागवड करताना पट्टा पद्धतीने लागवड करण्यावर विशेष भर दिला जात आहे. यामध्ये सरींमध्ये साडेतीन फूट तर दोन पट्ट्यातील अंतर हे साडेचार फूट ठेवण्यात येत आहे. एआय तंत्रज्ञानाचा शेती क्षेत्रात वाढता प्रभाव लक्षात घेता अत्याधुनिक पद्धतीने शेती करणारे अनेक शेतकरी उसाच्या शेतीमध्ये हे तंत्रज्ञान वापराच्या तयारीत आहेत.

शुगर केन नर्सरी तंत्रज्ञानाचा वापर करून रोपे तयार करूनच उसाची लागवड शेतकऱ्यांनी करावी. वाढता खर्च लक्षात घेता शेतकऱ्यांनी उत्पादन वाढीवर देखील लक्ष द्यावे यासाठी अत्याधुनिक ए आय तंत्रज्ञानाचा वापर शेतकऱ्यांनी करण्याचे आवश्यक आहे. ए आय तंत्रज्ञानाच्या वापराबद्दल व अधिक माहितीसाठी शेतकऱ्यांनी आपापल्या भागातील सहाय्यक कृषी अधिकारी व कृषी विभागाशी संपर्क साधावा
- किरण पिसाळ, प्रभारी तालुका कृषी अधिकारी, इंदापूर

00124