कालठणमध्ये पथदिवे बसविण्याची मागणी

लोणी देवकर, ता. १३ : इंदापूर तालुक्यातील उजनी पाणलोट क्षेत्रातील महत्त्वाच्या असलेल्या कालठण ग्रामपंचायतच्या हद्दीत सीसीटीव्ही बसवण्याबाबतचा मुद्दा पुढे आल्यानंतर ग्रामस्थांनी आधी विजेच्या खांबावर दिवे बसवा नंतर सीसीटीव्हीचे पाहू अशी संतप्त प्रतिक्रिया देत ग्रामपंचायत प्रशासनाच्या कामकाजाबाबत नाराजी व्यक्त केली.
उजनी पाणलोट क्षेत्रातील कालठण न.१ व परिसरातील गावांमध्ये काही दिवसांपासून रात्रीसह भर दिवसाही चोरीच्या घटनांमध्ये वाढ झाली आहे. चोऱ्यांच्या पार्श्‍वभूमीवर या भागातील ग्रामस्थांमध्ये भीतीचे वातावरण असताना मागील आठवड्यात गावच्या ज्या भागात चोरी झाली त्या भागातील सर्व पथदिवे अनेक दिवसांपासून बंद पडल्याची धक्कादायक बाबही समोर आले आहे. या बंद पडलेल्या दिव्यांमुळेच चोरांचे फावत असल्याचेही ग्रामस्थांमधून बोलले जात आहे. गावाच्या महत्त्वाच्या भागात सीसीटीव्ही बसवण्याची मागणी पुढे आली असताना सीसीटीव्ही तर दूरच पण गावातील महत्त्वाच्या चौकाच्या हायमास्ट मधील काही विजेचे दिवे आणि अनेक ठिकाणी पथदिवेही बंद असल्याची बाब ग्रामस्थांनी निदर्शनास आणून देत प्रशासन नक्की करताय काय असा प्रश्‍न उपस्थित केला आहे.
दरम्यान दोन वर्षांपासून स्थानिक स्वराज्य संस्थांच्या निवडणुका न झाल्याने ग्रामपंचायतीमध्ये प्रशासक राज आहे. यामध्ये ग्रामस्थांना मूलभूत सोयी सुविधां पासूनही वंचित राहावे लागत असल्याने प्रशासनाच्या कामाबाबत ग्रामस्थांकडून नाराजी व्यक्त केली जात आहे. वाढत्या चोऱ्यांचे प्रमाण लक्षात घेता सुरक्षिततेच्या उपाययोजना म्हणून ग्रामपंचायत प्रशासनाकडून गावातील विजेच्या खांबावरील दिवे कार्यान्वित करणे गरजेचे आहे. यामुळे याबाबत पंचायत समिती स्तरावरून ग्रामपंचायत प्रशासनाला योग्य त्या सूचना होऊन ग्रामस्थांना मूलभूत सुविधांचा लाभ मिळवून देण्यासाठी प्रयत्न होणे आवश्यक असल्याची मागणी सतीश शिंदे यांच्यासह ग्रामस्थांनी केले आहे.

चौकातील दिव्याखाली अंधार
लाखो रुपये खर्च करून गावामध्ये अनेक ठिकाणी बसवण्यात आलेले हायमास्ट दिवे अनेक दिवसांपासून अर्ध प्रकाशित अथवा बंद आहेत. प्रशासनाच्या ढिसाळ कारभारामुळे ग्रामस्थांना मूलभूत गरजांनादेखील मुकावे लागत आहे. यातच अनेक दिवसांपासून जगताप वस्तीवरील हायमास्ट दिवा बंद गावातील काही हायमास्ट दिवे काही बंद तर काही सुरू असल्याने दिव्याखालीच अंधार म्हणायची वेळ आली आहे.