चोरीच्या धास्तीने डाळिंब बागांतही पहारा

लोणी देवकर, ता. २१ : एकीकडे डाळिंबाच्या दरवाढीने शेतकरी आनंदी असताना दुसरीकडे शेतातून फळाची चोरी होण्याच्या घटनांमुळे दहशतीचे वातावरण आहे. दरवाढ होताच हे चोऱ्यांचे सत्र सुरू होते. त्यामुळे इंदापूर तालुक्यातील शेतकऱ्यांकडून आतापासूनच सावध भूमिका घेत फळबागांत दिवस रात्र खडा पहारा देण्याचे काम सुरू आहे.
डाळिंबाचे दर १२० ते ४५० रुपये प्रती किलोपर्यंत गेले आहेत. यामुळे वाढता बाजार भाव लक्षात घेता चोरांकडून रात्रीच्या वेळी फळांची तोडणी करून पोत्यांमध्ये फळे भरून पसार होतात. यामध्ये शेतकऱ्यांचे लाखोंचे नुकसान होते. यापूर्वीही अशा घटना घडल्या आहेत. इंदापूर तालुक्यातील शेतकऱ्यांकडून याला आळा घालण्यासाठी खबरदारी म्हणून आपल्या डाळिंब बागांत कुटुंबासह रात्री खडा पहारा दिला जात आहे. उत्पादकांच्या घरामध्ये दिवस पाळी व रात्रपाळीच्या पहाऱ्यांचे घरातील व्यक्तींमध्ये वाटप होते. घरातील काही पुरुष व महिला दिवसा, तर काही रात्रीच्या वेळी पहारा देतात.

बेरोजगार तरुणांना अच्छे दिन
डाळिंब उत्पादक शेतकऱ्यांकडून रात्रीचा पहारा देण्यासाठी बेरोजगार तरुणांना राखणदारीसाठी ठेवले जात आहे. यामध्ये त्यांना पाचशे ते हजार रुपये रोजंदारी दिली जाते. ज्यामुळे बेरोजगार तरुणांना रोजगार उपलब्ध होत आहे.

यापूर्वी डाळिंबाच्या बाजारभावात वाढ झाल्यानंतर चोऱ्यांचे सत्र सुरू झाल्याचा अनुभव आहे. त्यावर उपाययोजना म्हणून आतापासूनच पहारा सुरू केला आहे. ज्यामुळे बाग सुरक्षित राहून वाढलेल्या बाजारभावाचा फायदा घेत काही प्रमाणात सुगीचे दिवस येऊ शकतात.
- सुरेश गोरख ढुके, डाळिंब उत्पादक शेतकरी, अगोती नं.२