वरकुटे बुद्रुक येथील पुलावर कठडे बसविण्याची मागणी

लोणी देवकर, ता. २४ ः वरकुटे बुद्रुक (ता. इंदापूर) येथील मुख्य चौकातील ओढ्यावर असणाऱ्या जुन्या पुलावर संरक्षक कठडे नसल्याने नागरिकांच्या सुरक्षिततेचा प्रश्न निर्माण झाला आहे. रस्त्याचा अंदाज न आल्याने यापूर्वी अनेक छोटे- मोठे अपघात घडले असून, भविष्यातही मोठा अपघात होण्याची शक्यता वाढली आहे. त्यामुळे पुलावर तातडीने संरक्षक कठडे बसवावेत, अशी मागणी स्थानिक ग्रामस्थांनी केली आहे.
या पुलावरून दररोज नागरिकांसह शालेय विद्यार्थ्यांची मोठ्या प्रमाणात ये- जा होत असते. पावसाळ्यात पुलाखालून मोठ्या प्रमाणात पाणी वाहत असून, नळ्या अपुऱ्या पडत असल्यामुळे रस्त्यावरूनच पाणी वाहते. अशावेळी पुलावर कठडे नसल्यामुळे रस्त्याचा अंदाज न आल्याने वाहतुकीस गंभीर धोका निर्माण झाला आहे. त्यातच जीर्ण पुलावरच नवीन सिमेंटचा रस्ता टाकल्याने पूल अधिकच खचला आहे. यामुळे जुना, तडे गेलेला दगडी पूल पाडून नव्याने बांधण्याची गरज आहे.
दरम्यान, गेल्या काही दिवसांपासून पूल कोसळणाच्या घटना घडल्याने उपमुख्यमंत्री अजित पवार व जिल्हाधिकारी जितेंद्र डुडी यांनी धोकादायक पुलांचे सर्वेक्षण करून यादी करण्याबाबत सूचित केले होते. त्यानुसार धोकादायक पुलांच्या यादीत वरकुटे बुद्रुक येथील पुलाचा समावेश करून जुना पूल पाडून नवीन पूल बांधण्यात यावा, अशी मागणी ग्रामस्थांमधून होत आहे.

ओढ्यावरील पुलाला संरक्षण कठडे नसल्यामुळे रस्त्याचा अंदाज आला नाही. त्यामुळे मी पुलावरून ओढ्यामध्ये पडले, माझ्या हनुवटीला गंभीर जखम होत आठ टाके पडले होते. यामुळे पुलाला तत्काळ कठडे बसवण्यात यावे.
- सखूबाई पखाले, अपघात ग्रस्त महिला