नोकरीत स्थानिकांना प्राधान्य देण्याची मागणी

लोणी देवकर, ता. ३ : लोणी देवकर औद्योगिक वसाहतीतील वॉलमॉंट कंपनीत स्थानिकांना रोजगारात प्राधान्य द्यावे या मागणीसाठी बळपुडी (ता. इंदापूर) येथील ग्रामस्थांनी प्रशासन दरबारी आवाज उठविला आहे. ग्रामस्थांनी तहसीलदार यांना निवेदन दिले असून १५ ऑगस्ट म्हणजेच स्वातंत्र्य दिनी इंदापूर तहसील कार्यालयात उपोषण करण्याचा इशारा दिला आहे.
संबंधित कंपनीत गेली अनेक वर्षे बाहेरील मजुरांना कामावर ठेवले जात असून स्थानिक कामगार, युवक व बेरोजगारांना डावलले जात आहे. ग्रामपंचायत सरपंच व सदस्यांसह गावकऱ्यांनी वारंवार तक्रार करूनही याकडे जाणीवपूर्वक दुर्लक्ष करण्यात येत असल्याचा आरोप लहू गाढवे यांनी केला आहे.
स्थानिक युवकांना हाताला काम मिळावे व पुढील पिढीचा उपजीविकेचा प्रश्न सुटावा, यासाठी वडीलधाऱ्या मंडळींनी कवडीमोल दराने जमिनी दिल्या. परंतु, औद्योगिक वसाहतीतील कंपन्यांचा गावासाठी फायदा कमी आणि तोटा अधिक आहे. गावात कंपन्यांमुळे प्रदूषण वाढले आहे, जमिनीही गेल्या आहेत, त्याचा कोणताही फायदा गावातील युवकांना झालेला नाही, असे ग्रामस्थांनी स्पष्ट केले. स्थानिकांवर अन्याय सुरूच असून कंपन्यांकडून पारदर्शक व न्याय्य भरती प्रक्रिया केली जात नाही, अशी तक्रार आहे.