प्रॉपर्टी कार्डावरील दुरुस्तीचा शासनाला विसर

लोणी देवकर, ता. ४ : केंद्र सरकारच्या स्वामित्व योजनेअंतर्गत लोणी देवकर गावात ड्रोनद्वारे सर्वेक्षण करून प्रॉपर्टी कार्डचे वाटप झाले होते. या प्रक्रियेत अनेक ग्रामस्थांची नावे, आडनाव, क्षेत्रफळ आणि मालमत्तेवरील नोंदी यात चुका होत्या. त्याची १५४ ग्रामस्थांनी भूमिअभिलेख कार्यालयाकडे लेखी तक्रारी दाखल केली. मात्र, याबाबत ठोस कार्यवाही झाली नाही. आता महसूल सप्ताहामध्ये याबाबत कार्यवाही करण्याची ग्रामस्थांची मागणी आहे.
काही प्रकरणांमध्ये मालमत्तेवर इतर व्यक्तींच्या नावाची नोंद, तर काही प्रॉपर्टी कार्डवर क्षेत्रफळ चुकीचे आहे. या चुकीमुळे खरेदी-विक्री व्यवहारात अडथळे येत असल्याचे ग्रामस्थांचे म्हणणे आहे. वारस नोंदणी प्रक्रिया ठप्प झाली असून कर्ज घेताना अडचणी येत आहे. या समस्येविषयी २०२३ मध्ये भूमिअभिलेखाचे तत्कालीन अधिकारी पिसे यांच्या अध्यक्षतेखाली शिबिरही झाले. यात प्राप्त तक्रारींची तपासणी करून दुरुस्ती अहवाल वरिष्ठ कार्यालयाकडे सादर झाला. मात्र, त्याकाळात पिसे यांची बदली झाली आणि त्यानंतर अधिकारी बदल होत राहिल्याने या कामात अडथळे आले. दरम्यान, भूमिअभिलेख कार्यालयाकडून आजवर फक्त नोटीस पाठवल्या जात असून प्रत्यक्ष कारवाई होत नाही.

पुन्हा चार दिवसांचे शिबिर
भूमिअभिलेख कार्यालयाकडून ४, ५, ६ ऑगस्ट रोजी पुन्हा शिबिर घेण्यात येणार आहे. मात्र, यावेळीही केवळ नोटीस देऊन वेळकाढूपणा होणार की प्रत्यक्ष दुरुस्ती करण्यात येणार, याकडे ग्रामस्थांचे लक्ष लागले आहे.

इंदापूर भूमिअभिलेख कार्यालयाकडे केवळ नोंदीचे अधिकार आहेत. प्रत्यक्ष दुरुस्तीचे अधिकार वरिष्ठ कार्यालयाकडे आहेत. याच पार्श्वभूमीवर तत्कालीन महसूल मंत्री राधाकृष्ण विखे पाटील यांनी दुरुस्तीचे आदेश दिले होते. हा निर्णय अनेकवेळच्या अपीलानंतर तसेच खासगी वकिलामार्फत व कृषी मंत्री दत्तात्रेय भरणे यांच्या मार्गदर्शनाखाली पाठपुरावा करत मंजूर झाला. आता महसूल सप्ताहामध्ये हा विषय मार्गी लावत प्रॉपर्टी कार्डामधील वैधानिक दुरुस्त्या होणे आवश्यक आहे.
- सचिन विठ्ठल डोंगरे, ग्रामस्थ, लोणी देवकर

प्रभावित ग्रामस्थांची ठाम मागणी
प्रॉपर्टी कार्डावरील चुका तातडीने दुरुस्त करून योग्य नोंदी करण्याच्या मागणीवर ग्रामस्थ ठाम आहेत. चुकीच्या नोंदीमुळे अनेकांचे व्यवहार, कर्ज प्रकरण, वारस नोंदणी प्रक्रियेत अडथळे येत आहेत. त्यामुळे शासनाने या समस्येवर कायमस्वरूपी तोडगा काढावा, असे ग्रामस्थांचे म्हणणे आहे.