पळसदेव येथे रंगल्या पुणे विभागीय खो-खो स्पर्धा

लोणी देवकर, ता. १० : पळसदेव (ता. इंदापूर) येथे १९ वर्षांखालील मुले आणि मुलींच्या शालेय विभागीय खोखो स्पर्धा पार पडल्या. यामध्ये मुलांच्या गटात पुणे ग्रामीण संघाने पुणे शहराच्या संघाला तर मुलींच्या गटामध्ये सोलापूर ग्रामीण संघाने सोलापूर शहराच्या संघाला पराभूत करत विजेतेपद पटकाविले. दोन्ही विजेते संघ १५ ते १७ नोव्हेंबर रोजी नाशिक येथे होणाऱ्या शालेय राज्यस्तरीय स्पर्धेमध्ये पुणे विभागाचे प्रतिनिधित्व करणार आहेत.
क्रीडा व युवक संचालनालय पुणे आणि एल. जी. बनसुडे विद्यालय यांच्यावतीने विद्यमाने पळसदेव येथे पुणे विभागीय खो-खो स्पर्धा पार पडली. स्पर्धेमध्ये पुणे, सोलापूर, नगर व पिंपरी चिंचवड येथील शालेय जिल्हा विजेते संघ स्पर्धेमध्ये सहभागी झाले होते. इंदापूर तालुका क्रीडा अधिकारी महेश चावले यांच्या मार्गदर्शनाखाली ही स्पर्धा खेळीमेळीच्या वातावरणात झाली.
विभागीय स्पर्धांचे उद्‍घाटन एल. जी. बनसुडे संस्थेचे संस्थापक-अध्यक्ष हनुमंत बनसुडे, सचिव नितीन बनसुडे व कार्याध्यक्षा नंदा बनसुडे यांच्या हस्ते पार पडले. स्पर्धेसाठी पुणे जिल्हा खोखो संघटनेचे सचिव शिरीन गोडबोले यांच्या मार्गदर्शनाखाली तज्ञ पंचांनी काम पाहत स्पर्धा पूर्ण केली. स्पर्धेसाठी क्रीडा कार्यालयाकडून मिलिंद खुरपे व संघटनेच्या वतीने राष्ट्रीय प्रशिक्षक संघटनेचे खजिनदार जगदीश नानजकर, राष्ट्रीय खेळाडू पुष्कर बर्वे यांनी काम पाहिले. प्राचार्या वंदना बनसुडे, मुख्याध्यापक राहुल वायसे, क्रीडाशिक्षक सतीश बनसुडे, कैलास जाधव यांनी स्पर्धा पार पाडण्यासाठी परिश्रम घेतले.

स्पर्धेचे निकाल (वयोगट, अनुक्रमे प्रथम, द्वितीय, तृतीय)
१९ वर्षे मुले : नंदिकेश्वर विद्यालय, जंक्शन (पुणे ग्रामीण), सर परशुराम महाविद्यालय, पुणे (पुणे शहर), न्यू इंग्लिश स्कूल, वेळापूर (सोलापूर ग्रामीण)

१९ वर्ष मुली : न्यू इंग्लिश स्कूल, वेळापूर (सोलापूर ग्रामीण), स्वामी विवेकानंद प्रशाला, जुळे सोलापूर (सोलापूर शहर), श्री भैरवनाथ विद्यालय व ज्यू कॉलेज, शिंगवे (पुणे ग्रामीण).