स्कार्पिओ गाडी व उसाचा ट्रक यांची समोरासमोर धडक

अवसरी फाट्यावर भीषण अपघात
स्कार्पिओ गाडी व उसाचा ट्रकची समोरासमोर धडक; पाच जण जखमी
मंचर, ता. १९ : अवसरी फाटा (ता. आंबेगाव) ते पारगाव रस्त्यावर अवसरी फाट्यापासून पूर्वेला ५०० मीटर अंतरावर स्कार्पिओ गाडी व उसाचा ट्रक यांची समोरासमोर धडक होऊन झालेल्या भीषण अपघातात स्कार्पिओ गाडीतील पाच जण गंभीर जखमी झाले आहेत. सर्व जखमी खेड तालुक्यातील निघोजे व ठाकूर पिंपरी येथील आहेत. रविवारी (ता. १९) संध्याकाळी साडेपाचच्या सुमारास अपघात झाला. अपघातामुळे रस्त्यावरील वाहतूक ठप्प झाली होती. परिसरात राहणाऱ्या नागरिकांनी ताबडतोब मदत करून जखमींना मंचर येथील एका खासगी रुग्णालयात उपचारासाठी दाखल केले आहे.

चालक संतोष सोपान पवार (वय ४०), अपर्णा संतोष पवार (वय ३६), अदिती संतोष पवार (वय १० सर्व रा. निघोजे, ता. खेड), प्राजक्ता प्रदीप ठाकूर (वय २७), ज्ञानदा प्रदीप ठाकूर (वय ३, सर्व रा. ठाकूर पिंपरी, ता.खेड) अशी जखमींची नावे आहेत. हे सर्वजण पिंपळगाव खडकी (ता. आंबेगाव) येथे असलेले त्यांच्या नातेवाइकांना भेटण्यासाठी आले होते. त्यांना भेटून अवसरी खुर्दमार्गे निघोजे गावाकडे स्कार्पिओतून (एमएच- १४ डीएन- ८५५६) जात होते. दरम्यान, विरुद्ध दिशेने ऊस वाहतूक करणाऱ्या ट्रकची (एमएच-०४ एफ-७७२५) व स्कार्पिओ गाडीची समरसमोर धडक झाली. दोन्ही गाड्या फरफटत दहा ते बारा फूट पुढे गेल्या. स्कार्पिओ गाडीच्या पुढील भागाचा चक्काचूर झाला असून, ट्रकच्याही चालकाच्या बाजूचा भाग निकामी झाला आहे. अपघात झाल्यानंतर स्कार्पिओ गाडीत अडकलेल्या गंभीर जखमींना बाहेर काढणे अवघड झाले होते.

स्थानिक ग्रामस्थ शिवसेनेचे (उद्धव बाळासाहेब ठाकरे) जिल्हाप्रमुख सुरेश भोर, बाळासाहेब भोर, संदीप भोर, विलास काळे, विकास भोर, शिवराज भोर, गौरव भोर, अर्जुन काजळे यांनी स्कार्पिओमध्ये अडकलेल्या पाच जणांना बाहेर काढण्यासाठी स्कार्पिओचा पुढील भाग तोडून टाकला. त्यानंतर त्यांना सुखरूप बाहेर काढले. अपघातामुळे वाहतूक बंद पडल्याने भोरमळ्यातून पारगाव, मंचर व पुणे भागातील वाहतूक सुरू करण्यात आली. दरम्यान, ट्रकचालक पळून गेला आहे. मंचर पोलिसांनी घटनास्थळी भेट दिली असून, रीतसर पंचनामा केला आहे. रस्त्यात उभी असलेली अपघातग्रस्त वाहने बाजूला करण्यासाठी पोलिस यंत्रणा प्रयत्न करत होती. ट्रकचालकाचा शोध पोलिस घेत आहेत.
..............................
अवसरी फाटा (ता.आंबेगाव) : अवसरी फाटा ते पारगाव रस्त्यावर अपघात ग्रस्त स्कार्पिओ गाडीच्या पुढील भागाचा झालेला चक्काचूर.
................
अवसरी फाटा (ता.आंबेगाव) : अवसरी फाटा ते पारगाव रस्त्यावर अपघातग्रस्त ऊस ट्रक.