पिंपळगाव येथे महिलांना प्रशिक्षण

मंचर, ता. ११ : पिंपळगाव तर्फे महाळुंगे (ता. आंबेगाव) हे गाव दुधाची पंढरी म्हणून ओळखले जाते. येथील शेतकरी कुटुंबातील ४० महिलांना आठवडाभर मोफत दूध प्रक्रिया उद्योगाचे प्रशिक्षण दिले. या प्रशिक्षणात महिलांनी गुलाबजाम, काजू कतरी, पेढे, कलाकंद, बासुंदी, फिरनी, श्रीखंड, लस्सीचे विविध प्रकार, रसगुल्ले आदी तयार केलेले मिठाईचे पदार्थ पाहून गावकरीही भारावून गेले.

पिंपळगाव ग्रामपंचायतच्या सभागृहात १४ व्या वित्त आयोगातून ज्ञानशक्ती विकास वाहिनी संस्था मंचर व ग्रामपंचायत यांच्यावतीने सदर प्रशिक्षण आयोजित केले होते. प्रशिक्षणाचे उद्घाटन सरपंच दीपक पोखरकर व उपसरपंच अर्चना राक्षे यांच्या हस्ते झाले. यावेळी ग्रामविकास अधिकारी के.बी फाकटकर, ग्रामपंचायत सदस्या सुनीता बांगर, माजी उपसरपंच शैला घेवारी, सुजाता पोखरकर, मोहिनी बांगर, पूजा बांगर उपस्थित होत्या.

प्रशिक्षणात विविध दुग्धजन्य पदार्थ तयार करण्याचे प्रात्यक्षिकासह प्रशिक्षण दिल्यामुळे महिलांचा आनंद द्विगणीत झाला.

ज्ञानशक्ती विकास वाहिनीच्या मुख्य कार्यकारी अधिकारी गार्गी विशाल काळे पाटील यांनी दूध प्रक्रिया उद्योगाचे महत्त्व पॅकिंग व बाजारपेठ याविषयी मार्गदर्शन केले. प्रशिक्षक लता मेंगडे यांनी प्रात्यक्षिकासह दुधापासून बनवणाऱ्या विविध पदार्थविषयक परिपूर्ण माहिती दिली. महिलांनी उपस्थित केलेल्या प्रश्नांची त्यांनी समर्पक उत्तरे दिली. माधुरी गावडे व सुनंदा मांदळे यांनी यावेळी मार्गदर्शन केले.