आंबेगावात भरारी पथकांची नजर

मंचर, ता. ४ : शिरूर लोकसभा मतदारसंघांतर्गत असलेल्या आंबेगाव विधानसभा मतदारसंघात निवडणूक प्रशासनाने गतिमान पद्धतीने आचारसंहितेची अंमलबजावणी सुरु केली आहे. घोडेगाव, मंचर व पारगाव या तीन पोलिस ठाण्यांच्या हद्दीत दिवसा व रात्री अशी एकूण ६ भरारी पथकांची नियुक्ती केली आहे. भयमुक्त आणि पारदर्शक वातावरणात निवडणूक पार पाडण्यासाठी प्रशासनाने सर्व जय्यत तयारी केली आहे, अशी माहिती निवडणूक निर्णय अधिकारी तथा प्रांत अधिकारी गोविंद शिंदे व तहसीलदार संजय नागटिळक यांनी दिली.
गोविंद शिंदे म्हणाले, ‘‘शिरूर लोकसभा मतदारसंघासाठी १३ मे रोजी मतदान होणार आहे. आंबेगाव विधानसभा मतदारसंघात १४३ गावांत ३३८ मतदान केंद्र आहेत. निवडणुकीसाठी विविध विभागांतील अधिकाऱ्यांच्या माध्यमातून निवडणूक कामकाज सुरू आहे. त्यासाठी शिरूर लोकसभा मतदारसंघाचे निवडणूक निर्णय अधिकारी अजय मोरे यांच्या मार्गदर्शनाखाली निवडणूक तयारी, कर्मचारी नेमणूक, मतदार जनजागृती, आचारसंहिता अंमलबजावणी, एक खिडकी योजनेच्या माध्यमातून जाहीर सभा, मेळावे, प्रचार रॅली यासाठी परवानगी आदी कामकाज सुरू आहे.’’
‘‘आंबेगाव तालुक्यात संवेदनशील मतदान केंद्र नाहीत. अद्याप आचारसंहिताभंगाच्या ऑनलाइन तक्रारी दाखल झालेल्या नाहीत. किरकोळ तक्रारीचे निराकरण केले आहे. उमेदवारांना सर्व प्रकारच्या परवानग्यांसाठी आंबेगाव पंचायत समितीमध्ये एक खिडकी योजना सुरू केली आहे,’’ अशी माहिती आचारसंहिताभंग पथक प्रमुख तथा आंबेगाव तालुक्याच्या गटविकास अधिकारी प्रमिला वाळूंज यांनी दिली.

आंबेगाव विधानसभा मतदारसंघ
• एकूण मतदार : २ लाख ९८ हजार ५९८
• स्त्री मतदार संख्या : १ लाख ४५ हजार ७५६
• पुरुष मतदार संख्या : १ लाख ५२ हजार ८३४
• तृतीयपंथी मतदार : ८
• मतदान केंद्रांची संख्या : ३४०
• निवडणुकीसाठी क्षेत्रीय अधिकारी : ३२

विविध विभागांतील सुमारे २५० कर्मचाऱ्यांची नियुक्ती केली आहे. उन्हाळ्याच्या पार्श्वभूमीवर मतदारांकरिता मेडिकल किट उपलब्ध करून दिले जाणार आहे.
- डॉ. सचिन वाघ, नायब तहसीलदार, निवडणूक विभाग, आंबेगाव