वीज खंडित झाल्याने छुप्या प्रचाराला फटका

मंचर, ता ११ : मंचर शहर, अवसरी खुर्द गावडेवाडी पिंपळगाव तांबडे मळा परिसरात शनिवारी (ता ११) संध्याकाळी पाच वाजल्यापासून रात्री दहा वाजेपर्यंत विजेचा कडकडाट होत होता. वादळी पावसामुळे वारंवार वीजपुरवठा खंडित झाला. वीज गायब होण्याच्या प्रकाराने छुप्या पद्धतीच्या निवडणूक प्रचारावरही मोठा परिणाम झाल्याचे जाणवले.
वीजपुरवठा सुरळीत होण्यासाठी महावितरण कंपनीचे जनमित्र व अधिकारी प्रयत्न करत होते. पण वीज पूर्ववत सुरू झाल्यानंतर पुन्हा आलेल्या वादळी पावसाने वीजपुरवठा खंडित होत होता. रात्री दहा वाजताही अनेक भागात वीजपुरवठा खंडित झालेला होता.
लोकसभा निवडणुकीचा शनिवारी संध्याकाळी जाहीर प्रचार संपला असला तरी घरात बैठक घेऊन सुरू झालेल्या प्रचारावरही पावसाचा मोठा परिणाम झाला. अनेकांचे मोबाईल चार्जिंग न झाल्याने प्रमुख कार्यकर्त्यांची संपर्क मोहीम यंत्रणा थंडावली होती. काही ठिकाणी आमरस पुरी व बिर्याणी जेवणाचे बेत होते ते रद्द झाले.