‘मंचरला अद्ययावत स्पर्धा परीक्षा केंद्र सुरू करणार’

मंचर, ता. १८ : ‘‘आंबेगाव तालुक्यात वित्त, पोलिस, वन, कृषी, आयकर, बँक, महसूल, सेल टॅक्स या क्षेत्रात ग्रामीण भागातील युवक युवतींची संख्या वाढली पाहिजे. त्यासाठी राज्य व केंद्रीय लोकसेवा आयोगाच्या परीक्षांबाबत मार्गदर्शन मिळण्यासाठी मंचर (ता. आंबेगाव) येथील अण्णासाहेब आवटे महाविद्यालय परिसरात अद्ययावत स्पर्धा परीक्षा केंद्र सुरू केले जाणार आहे. त्यासाठी आमदार दिलीप वळसे पाटील यांनी दीड कोटी रुपयांचा निधी उपलब्ध करून दिला आहे. काम प्रगती पथावर आहे.’’ अशी माहिती शरद सहकारी बँकेचे उपाध्यक्ष विवेक वळसे पाटील यांनी दिली.
मंचर येथे शरद सहकारी बँकेच्या सभागृहात बँकेच्या वतीने काजल इंदोरे (चांडोली खुर्द), ऋषिकेश खालकर (जवळे), पवन खंडागळे (आमोंडी), ओंकार गोरे (निरगुडसर) यांनी सनदी लेखापाल (सीए) परीक्षेत यश संपादन केल्याबद्दल व सौरभ थोरात (आमदाबाद ता. शिरूर) यांनी कामगार विभागात शुभम भालेराव (कळंब) यांनी बँक वर्ग १ परीक्षेत यश मिळविल्याबद्दल त्यांचा शाल व श्रीफळ देऊन विवेक वळसे पाटील, बाजार समितीचे उपसभापती सचिन पानसरे, उद्योजक सचिन भोर, शरद बँकेचे संचालक दत्ता थोरात, अरुणा थोरात यांच्या हस्ते सन्मान करण्यात आला. यावेळी प्रवीण मोरडे, सचिन बाणखेले, बाजीराव मोरडे, बाळासाहेब बाणखेले, राजेंद्र थोरात, राजेंद्र भंडारी, सुहास बाणखेले, रेवती वाडेकर उपस्थित होते. यावेळी काजल इंदोरे, ऋषिकेश खालकर यांनी मनोगत व्यक्त केले.