मंचरला कांद्याचा बाजारभाव कोसळला

मंचर ता. १० : येथील कृषी उत्पन्न बाजार समितीत रविवारी (ता. ९) ३५ हजार कांदा पिशव्यांची आवक झाली. गेल्या आठवड्याच्या तुलनेत बाजार भाव प्रतिकिलो दहा रुपयांनी घटले आहेत. गेल्या आठवड्यात प्रति किलोला २२ ते २७ रुपये बाजार भाव मिळाला होता. रविवारी १३ रुपये ते १७ रुपये प्रतिकिलो कांद्याला बाजारभाव मिळाला. बाजारभाव कमी झाल्याने व आर्थिक गणित बिघडल्यामुळे शेतकऱ्यांनी नाराजी व्यक्त करून संताप व्यक्त केला आहे.

मंचर कृषी उत्पन्न बाजार समितीत शेतकऱ्यांच्या समक्ष कांदा पिशव्यांचे वजन व लिलावपद्धतीने कांदा खरेदीचे व्यवहार केले जातात. त्यामुळे आंबेगाव, शिरूर व खेड तालुक्यांतील अनेक गावांतून कांद्याची आवक होते. तसेच नवीन कांदा काढणीची कामे सुरू आहेत. गेल्या आठवड्यात गुणवत्तेनुसार प्रति किलोला २२ ते २५ रुपये बाजारभाव मिळाला. त्यामुळे रविवारीही असाच बाजारभाव मिळेल, या अशाने शेतकऱ्यांनी निवड करून कांदा मंचर बाजार समितीत आणला होता. पण, बाजारभाव कोसळल्याने कांदा उत्पादक शेतकरी हवालदील झाले आहेत.

याबाबत आंबेगाव तालुका कृषी उत्पन्न बाजार समिती सभापती नीलेश थोरात व कांदा खरेदीदार अडते सागर थोरात म्हणाले, ‘‘कांदा निर्यातीवर सध्या केंद्र सरकारने २० टक्के ड्यूटी लावली आहे. ही ड्यूटी रद्द केल्यास कांद्याचे बाजार भाव पूर्वपदावर येऊ शकतात. हा प्रश्न विधिमंडळात मांडून राज्य सरकारच्या मदतीने केंद्र सरकारकडे पाठपुरावा करण्याविषयी कांदा उत्पादकांनी माजी मंत्री तथा आमदार दिलीप वळसे पाटील यांना निवेदन दिले आहे.’’

कांद्याचे प्रति दहा किलोचे बाजारभाव
सुपर लॉट एक नंबर गोळा कांदा १५० ते १७० रुपये, सुपर गोळे कांदे एक नंबर १३० ते १५० रुपये, सुपर मीडियम दोन नंबर कांद्यास ११० ते १३० रुपये, गोल्टी कांदा ९० ते ११० रुपये, बदला कांदा ५० ते ८० रुपये, असा बाजारभाव मिळाला.