पेठमधील अपहरणप्रकरणी फरारी आरोपीला अटक

मंचर, ता. १८ : पेठ (ता. आंबेगाव) येथे खासगी दवाखान्यातील डॉ. कैलास रघुनाथ वाळे (रा. मंचर, ता. आंबेगाव) यांचे ४ जानेवारी रोजी अपहरण करून त्यांना जीवे मारण्याची धमकी देऊन त्यांच्याकडून एक लाख रुपयांची खंडणी घेतल्याप्रकरणी सहा जणांच्या विरोधात मंचर पोलिस ठाण्यात गुन्हा दाखल केला होता. त्यातील चार जणांना मंचर पोलिसांनी अटक केली होती. यातील फरारी असलेला प्रवीण उर्फ डॉलर सीताराम ओव्हाळ (वय ३२, रा. वाळद, ता. खेड) या आरोपीला आळेफाटा (ता. जुन्नर) येथे बसस्थानकावर आळेफाटा पोलिसांनी शनिवारी (ता. १५) अटक केली आहे. आरोपीकडून गावठी पिस्तूल, दोन जिवंत काडतुसे, असा एकूण ५१ हजार रुपयांचा मुद्देमाल जप्त केला आहे.
पोलिसांनी योगेश चौधरी, मनोज कडलग, पवन थोरात, डेली ऊर्फ तुषार टेके या चौघांना पोलिसांनी अटक केली होती. प्रवीण ओव्हाळ व आदिनाथ नाईकरे हे फरारी झाले होते. घडलेल्या गुन्ह्याची गांभीर्यता लक्षात घेऊन पोलिस अधीक्षक पंकज देशमुख, अपर पोलिस अधीक्षक रमेश चोपडे यांच्या मार्गदर्शनाखाली आरोपींचा शोध घेतला जात होता. स्थानिक गुन्हे शाखेचे पोलिस निरीक्षक अविनाश शिळीमकर, पोलिस अंमलदार दीपक साबळे, अक्षय नवले, संदीप वारे, राजू मोमीन, मंगेश चिगळे, विक्रम तापकीर, नीलेश सुपेकर यांनी आरोपी ओव्हाळ याला अटक केली. पुढील तपास आळेफाटा पोलिस करत आहेत.
मंचर पोलिसांनी दिलेल्या माहितीनुसार, डॉ. वांळे हे दुचाकीवरून मंचरला घरी जात असताना मोटारीने त्यांना पाठीमागून धडक दिली. मोटारीतील तिघांनी त्यांना मारहाण करत जबरदस्तीने मोटारीत बसवून निघोटवाडी जंगलात डोंगरावर नेले. ‘तू आम्हाला ओळखतो का? आम्ही सर्व या भागातील भाई आहोत. गुन्हेगारी आमचा पेशा आहे,’ असे म्हणत मारहाण करत त्यांचा आक्षेपार्ह व्हिडिओ बनवला. थोरात याने पिस्तुलाने गोळीबार करून, ‘आम्ही तुझा खून करायची सुपारी घेतलेली आहे. तुला जीव वाचवायचा असेल, तर आम्हाला २० लाख रुपये द्यावे लागतील,’ असे सांगितले. घाबरलेल्या वाळे यांनी, ‘१५ लाख रुपये देतो. मला काही वेळ द्या,’ असे सांगितले. त्यानंतर डॉ. वाळे यांना घोडेगावला नेले. वाळे यांनी शरद बँकेतून एक लाख रुपये रक्कम काढून ओव्हाळ याच्याकडे दिली. त्यानंतर राजगुरुनगर बाह्यवळण रस्त्यावर मोटार थांबवली. तेथे चौधरी व कडलग आले. ‘तू नादी लागू नको, आम्ही पोलिस ठाण्यात तुझ्याविरुद्ध विनयभंगाची केस करणार आहोत. केस मिटवायची असेल, तर आणखी दोन लाख रुपये द्यावे लागतील,’ असे म्हणत चौधरी याने डॉ. वाळे यांना मारहाण केली. पोलिसांत तक्रार दिली, तर जिवे मारण्याची धमकी दिल्यानंतर रात्री डॉ. वाळे यांना पेठ येथे सोडून दिले. त्यानंतर डॉ. वाळे यांनी मंचर पोलिसांत धाव फिर्याद दाखल केली.