सातगावातील नऊ बंधारे तुडुंब

मंचर, ता.१८ : सातगाव पठार (ता.आंबेगाव) भागात गेल्या २० वर्षात प्रथमच मे महिन्यात बुधवार (ता.१४) ते शुक्रवार (ता.१६) सलग तीन दिवस जोरदार वळवाचा पाऊस झाला. त्यामुळे ओढ्या-नाल्यांना व वेळ नदीला पूर आला असून नदीवरील नऊ बंधारे पाण्याने तुडुंब भरले आहेत. सरासरी एकूण १०० मिलिमीटर पेक्षा अधिक पाऊस झाला आहे. शेत मशागतीसाठी पाऊस उपयुक्त आहे त्यामुळे शेतकरी वर्गात आनंदाचे वातावरण आहे.
सातगाव पठार भागातील कुरवंडी, कोल्हारवाडी, थुगाव, भावडी, कारेगाव, पेठ व पारगाव तर्फे खेड या भागातील शेतकऱ्यांना दरवर्षी बटाटा लागवडीसाठी ता.१५ जूनपर्यंत पावसाची वाट पहावी लागते. पण या वर्षी मात्र पावसाने लवकर सुरुवात केली आहे. कोरड्या पडलेल्या विहिरी पाण्याने तुडुंब भरल्या आहेत, असे भावडी येथील प्रगत शेतकरी अशोक बाजारे यांनी सांगितले.

पेठ येथील अशोक विठ्ठल राक्षे यांच्या घराच्या तिसऱ्या मजल्यावर विजेचा लोळ घराचा पत्रा छेडून भिंतीमध्ये आला. त्यामुळे भिंतीला चीर पडली आहे. सुदैवाने जीवितहानी टळली. मात्र या घटनेत घरातील इलेक्ट्रिक फिटिंग, टीव्ही, फ्रीज, फॅनसह इलेक्ट्रिक साहित्य जाळून गेले. ९० हजार रुपयांचे नुकसान झाले. शेजारी संतोष भालेराव यांचा टीव्ही जाळल्याने त्यांचे २० हजार रुपयांचे व वाकेश्वर झेरॉक्स दुकानातील इन्वर्टर बॅटरी, वाय-फाय राऊटर जाळले दहा हजार रुपयांचे नुकसान झाल्याचे राजेंद्र एरंडे यांनी सांगितले. महसूल विभागाने नुकसानीचे पंचनामे करावेत, अशी मागणी पेठ ग्रामपंचायतीचे सरपंच संजय पवळे व ग्रामस्थांनी केली आहे.

दरवर्षी खरीप हंगामात सातगाव पठार भागात चार हजार एकर क्षेत्रात बटाटा लागवड केली जाते. पण यावेळी लवकर पाऊस झाला तरी शेतकरी बटाटा लागवड करणार नाहीत. कारण बटाटा लागवडीसाठी ता.२० जून नंतरच हवामान अनुकूल असते.
- रमेश सावंत पाटील, बटाटा उत्पादक शेतकरी, पारगाव तर्फे खेड (ता.आंबेगाव)

13247