चाकण, मोशीतील कोंडी संपुष्टात येणार : गडकरी

मंचर, ता.३० : ‘‘नाशिक फाटा ते राजगुरुनगर राष्ट्रीय महामार्गावर जमिनीवर आठ पदरी व पुलावरून आठ पदरी अशा एकूण सोळा पदरी प्रशस्त ३० किलोमीटर लांबीच्या रस्त्याचे
काम लवकर पूर्ण करण्यात येईल. रस्त्याच्या कामाची प्रक्रिया अंतिम टप्प्यात आहे. हे अंतर ३० ते ३५ मिनिटांत वाहनचालकाला पार करता येईल चाकण, मोशी, भोसरी भागातील वाहतूक कोंडी संपुष्टात येईल,’’ अशी ग्वाही केंद्रीय रस्ते वाहतूक आणि महामार्गमंत्री नितीन गडकरी यांनी दिली.
नागपूर येथे पुणे - नाशिक राष्ट्रीय महामार्गचे, समन्वयक इंजि. दिलीप मेदगे यांनी गडकरी यांना वाढदिवसानिमित्त शुभेच्छा दिल्या. मेदगे यांनी नाशिक फाटा ते राजगुरुनगर या राष्ट्रीय महामार्गा सोळा पदरी प्रशस्त रस्त्याचे काम व खेड ते सिन्नर या रस्त्याचे संपूर्ण सिमेंट काँक्रिटीकरण काम, पथरस्ते पूल, बाह्यवळणे आदी कामे मार्गी लावल्याबद्दल गडकरी यांचे अभिनंदन व आभार मानले.
मेदगे म्हणाले, “खेड ते सिन्नर राष्ट्रीय महामार्ग रस्त्यावर बाह्यवळण (बायपास) कामे वगळून १०५ किलोमीटर (थीन व्हाइट टॉपिंग) या नवीन संकल्पनेतून काँक्रीटीकरणामुळे रस्ता पुढील ४० वर्ष खड्डेमुक्त होणार आहे. यासाठी ३३६ कोटी रुपयांची तरतूद करून सद्यःस्थितीत काम सुरू आहे. यासोबत पथरस्ते, नारायणगाव, सिन्नर, संगमनेर येथे उड्डाणपुलाची कामे सुरू असून यासाठी १०४ कोटी रुपयांची तरतूद करण्यात आली आहे. प्रस्तावित कामांमध्ये तुकाई मंदिर येथील उड्डाणपूल व सर्विस रस्ता, साईखिंड, नांदूर शिंगोटे सिन्नर तीन कामांसाठी ७० कोटी निधीच्या कामांचे आदेश पारित करण्यात आले आहेत.त्यामुळे राजगुरुनगर ते आळेफाटा वाहतूक कोंडीचा प्रश्न दूर झाला .
राष्ट्रीय महामार्गाचे समन्वयक संजय कदम यांच्या सह सामान्य नागरिकांनी मोबाईल द्वारे गडकरी यांना शुभेच्छा दिल्या.

आदर्शगाव तांबडेमळा येथे राष्ट्रीय महामार्ग लगत पथ रस्ता, भुयारी रस्त्यासाठी मंत्री नितीन गडकरी, राष्ट्रीय महामार्गाचे समन्वयक संजय कदम, दिलीप मेदगे यांचे फार सहकार्य लाभले.
- प्राजक्ता तांबडे, सरपंच आदर्श गाव तांबडे मळा (तालुका आंबेगाव)

13301