‘केळी, आंब्यासाठी मिळणार अनुदान’

मंचर, ता.१ : ‘‘आंबेगाव तालुक्यासाठी केळी, आंबा व स्ट्रॉबेरी या पिकांची क्लस्टर साठी निवड झाली आहे. त्यासाठी अनुदानही मिळणार आहे. शेतकऱ्यांनी फळबाग लागवडीवर अधिक भर द्यावा,’’ असे आवाहन आंबेगाव तालुका कृषी अधिकारी सिद्धेश ढवळे यांनी केले.
अवसरी खुर्द (ता.आंबेगाव) येथे शुक्रवारी (ता.३०) झालेल्या ‘विकसित कृषी संकल्प अभियान २०२५’ शेतकरी मेळाव्यात ढवळे बोलत होते. यावेळी सरपंच वैभव वायाळ, उपसरपंच प्रवीण भोर, धोंडिबा महाराज शिंदे, गुलाब कराळे, भैरवनाथ शिंदे, राजगुरुनगर कांदा लसूण संशोधन केंद्राच्या वरिष्ठ शास्त्रज्ञ कल्याणी गोरे पाटील व शास्त्रज्ञ पी.एस.सौम्या उपस्थित होत्या.
अवसरी खुर्द येथील साहाय्यक कृषी अधिकारी छाया चव्हाण यांनी महात्मा गांधी रोजगार हमी योजने अंतर्गत फळबाग लागवड, महाडीबीटी, बीजप्रक्रिया, घरगुती बियाणे सोयाबीन उगवण क्षमता चाचणी, हुमणी कीड नियंत्रण, केळी, आंबा व स्ट्रॉबेरी या पिकांच्या क्लस्टर पद्धतीने लागवड याविषयी शेतकऱ्यांना माहिती दिली.
नारायणगाव कृषी विज्ञान केंद्राचे वरिष्ठ शास्त्रज्ञ योगेश यादव यांनी शेतकऱ्यांना माती परीक्षण, जमीन आरोग्य व्यवस्थापन, खरीप हंगाम पीक नियोजन, बीज प्रक्रिया याविषयी व मंचर मंडळ कृषी अधिकारी एस.बी.बिराजदार यांनी कृषी विभागाच्या योजना व गोपीनाथ मुंडे अपघात विमा योजना याविषयी मार्गदर्शन केले.
प्रवीण शिंदे, बाळासाहेब टेमकर, हरिश्चंद्र शिंदे, सुभाष टेमकर व धोंडिभाऊ भोर आदि शेतकऱ्यांनी विचारलेल्या विविध प्रश्नांना छाया शिंदे यांनी समर्पक उत्तरे दिली.

13308