पुणे मॉडेल स्कूल निवड प्रक्रियेवर आंबेगाव तालुक्यात आक्षेप

मंचर, ता. ४ : ‘पुणे मॉडेल स्कूल’ योजनेत आंबेगाव तालुक्यातील गुणवत्ताधारित आणि सर्वाधिक पटसंख्या असलेल्या प्राथमिक शाळा वगळण्यात आल्याच्या पार्श्‍वभूमीवर युवासेनेने योजनेतील निवड प्रक्रियेवर आक्षेप नोंदवत फेरचौकशी करण्याची मागणी केली आहे.
युवासेनेचे राष्ट्रीय कार्यकारिणी सदस्य सचिन बांगर यांनी बुधवारी (ता. ४) शालेय शिक्षणमंत्री दादा भुसे यांची मंत्रालय, मुंबई येथे भेट घेऊन यासंदर्भात सविस्तर चर्चा केली.
बांगर यांनी पिंपळगाव तर्फे महाळुंगे येथील जिल्हा परिषद प्राथमिक शाळेचा मुद्दा उपस्थित करत, ‘‘ही शाळा तालुक्यातील सर्वाधिक पटसंख्या, शैक्षणिक गुणवत्ता आणि सामाजिक सहभाग या बाबतीत आदर्श असूनही ‘पुणे मॉडेल स्कूल’ योजनेच्या यादीतून वगळण्यात आले आहे. हे अन्यायकारक आहे,’’ असे स्पष्ट केले.
याशिवाय तालुक्यातील प्रत्येक केंद्रातून सर्वाधिक पटसंख्या असलेल्या इतरही शाळा योजनेपासून वंचित राहिल्या असल्याचे निदर्शनास आणून देत, निवड प्रक्रियेत अपारदर्शकता आणि वशिलेबाजी झाल्याचा आरोप स्थानिक ग्रामस्थ, पालक आणि शिक्षकांनी केल्याचेही त्यांनी सांगितले.
यावेळी बांगर यांनी शिक्षणमंत्र्यांसमोर आंबेगाव तालुक्यातील ‘पुणे मॉडेल स्कूल’ निवड प्रक्रियेची सखोल चौकशी करण्यात यावी, केंद्रनिहाय फेरचौकशी करून गुणवत्ताधारित आणि सर्वाधिक पटसंख्या असलेल्या शाळांची यादी नव्याने तयार करण्यात यावी, पिंपळगाव तर्फे महाळुंगे शाळेला योजनेत तत्काळ समाविष्ट करून आवश्यक निधी मंजूर करण्यात यावा. अशी मागणी केली आहे.
या चर्चेची गांभीर्याने दखल घेत भुसे यांनी शिक्षण खात्यातील संबंधित अधिकाऱ्यांकडून तातडीने अहवाल मागवून आवश्यक ती चौकशी करून निर्णय घेण्याचे आश्वासन दिल्याचे बांगर यांनी सांगितले.