‘मंचर येथे आदिवासी मुलांचे नवीन वसतीगृह सुरू करावे’

मंचर, ता. ८ : ‘‘मंचर (ता. आंबेगाव) शहरात असलेले आदिवासी मुलांचे वसतिगृह अपुरे पडत आहे. त्यामुळे अनेक मुलांना उच्च शिक्षणापासून वंचित राहावे लागते. मंचर येथे नवीन वसतिगृह सुरू करावे, घोडेगाव येथे इंग्रजी माध्यमाच्या शाळेच्या आवारात जागा उपलब्ध असल्याने तेथे मुलींचे वसतीगृह सुरू करावे,’’ अशी मागणी आंबेगाव तालुका राष्ट्रवादी काँग्रेस पक्षाचे कार्याध्यक्ष प्रकाशराव घोलप यांनी घोडेगाव येथील एकात्मिक आदिवासी प्रकल्प अधिकारी प्रदीप देसाई यांच्याकडे निवेदनाद्वारे केली आहे.
शिनोली, घोडेगाव व मंचर या ठिकाणी असणाऱ्या आदिवासी विभागाच्या वसतिगृहामधील प्रवेशाबाबत घोलप यांच्या नेतृत्वाखालील प्रवीण बुधाजी पारधी, अमोल अंकुश, दिनेश गभाले, कुमार घोलप यांच्या शिष्टमंडळाने देसाई यांच्याबरोबर चर्चा केली.
घोलप म्हणाले की, आंबेगाव, खेड, जुन्नर तालुक्यात आदिवासी मुला-मुलींची संख्या मोठ्या प्रमाणात आहे. दरवर्षी वसतिगृह प्रवेशाबाबत उशिराने लागणाऱ्या प्रवेश यादीमुळे अनेक विद्यार्थ्यांचे शैक्षणिक नुकसान होते. ते होऊ नये यासाठी वेळेतच प्रवेश प्रक्रियेचे काम पूर्ण करावे. क्षमतेपेक्षा अधिक जागा वाढवून घेतल्या जातात. पण परवानगी मिळणे या कामाला विलंब लागतो. प्रवेशाची यादी लागण्यास दिवाळी पर्यंत वाट पाहावी लागते. अनेक विद्यार्थ्यांचे शैक्षणिक नुकसान होते. त्यामुळे सन २०२४-२५ या शैक्षणिक वर्षासाठी प्रवेश यादी लावतानाच अतिरिक्त मंजुरी घेतलेल्या जागा गृहीत धरूनच यादी लावावी आदिवासी विकास विभागात अर्ज करणाऱ्या ज्या विद्यार्थ्यांना वसतिगृहाला प्रवेश मिळत नाही. पण जिल्ह्याच्या ठिकाणी राहणाऱ्या विद्यार्थ्यांना आदिवासी विभागाकडून डीबीटी रक्कम दिली जाते. मात्र तालुक्याच्या ठिकाणी ज्यांचा नंबर लागत नाही. त्यांना मात्र अशी सुविधा मिळत नाही. त्यांना जिल्ह्याच्या विद्यार्थ्यांप्रमाणेच डीबीटी सुविधा मिळावी. डीबीटीची रक्कम वाढवून मिळावी. लाभार्थ्यांची व्यावसायिक परिस्थिती काय आहे. याची चौकशी करण्यात यावी. अशा अनेक विषयांवर चर्चा झाली. या विषयांबाबत माजी सहकारमंत्री दिलीप वळसे पाटील यांना निवेदन देऊन लवकरच याबाबत पुढील बैठक आयोजित करून शासनस्तरावर या विषयांचा पाठपुरावा केला जाईल. असे घोलप यांनी सांगितले.