मंचरमधील गुन्हेगार दोन वर्षांसाठी हद्दपार

मंचर, ता. १४ : मंचर (ता. आंबेगाव) पोलिस ठाण्याच्या हद्दीतील सराईत गुन्हेगार डेली ऊर्फ तुषार शांताराम टेके (वय २७, रा. वडगाव काशिंबेग, ता. आंबेगाव) याला पुणे व अहिल्यानगर जिल्ह्यातून दोन वर्षांच्या कालावधीसाठी हद्दपार केले आहे, अशी माहिती मंचर पोलिस ठाण्याचे वरिष्ठ पोलिस निरीक्षक श्रीकांत कंकाळ यांनी दिली.
डेली टेके याच्यावर खूनाचा प्रयत्न, खंडणी, मारामारी, अपहरण व अवैध वाळूचोरी, अशा गंभीर स्वरूपाचे एकूण सात गुन्हे दाखल असून, त्याला वेळोवेळी अटक व प्रतिबंधात्मक कारवाई करूनही त्याच्या वागण्यात सुधारणा झाली नव्हती. त्यामुळे सामान्य नागरिकांमध्ये भीतीचे वातावरण निर्माण झाले होते. त्यामुळे त्याच्या गुन्हेगारीला आळा बसावा व कायद्याचे बंधन राहावे. यासाठी मंचर पोलिसांनी जिल्हा पोलिस अधीक्षक संदीपसिंह गिल, अतिरिक्त पोलिस अधीक्षक रमेश चोपडे, खेडचे उपविभागीय पोलिस अधिकारी अमोल मांडवे व स्थानिक गुन्हे शाखेचे पोलिस निरीक्षक अविनाश शिळीमकर यांच्याकडे टेके याचा प्रस्ताव पाठविला होता. त्यानुसार दोन वर्षांच्या हद्दपारीचा प्रस्ताव मंजूर झाला.
कंकाळ, सहायक पोलिस निरीक्षक सुनील बडगुजर, नितीन बनकर, पोलिस हवालदार संजय नाडेकर, शेखर भोईर, नंदकुमार आढारी व पोलिस अंमलदार अविनाश दळवी, अजित पवार, योगेश रोडे या पथकाने शुक्रवारी (ता. १३) टेके याला बदलापूर (ता. अंबरनाथ, जि. ठाणे) येथे सोडले.