मंचरला तलाठी नसल्याने नागरिकांची गैरसोय

मंचर, ता. २० : मंचर (ता. आंबेगाव) येथे कामगार तलाठ्याची नियुक्ती न झाल्यामुळे नागरिकांना अनेक अडचणींचा सामना करावा लागत आहे. दहा दिवसांपूर्वी कामगार तलाठी दीपक हरण यांची बदली मावळ तालुक्यात झाली आहे. मात्र, त्यांच्या जागी अद्याप पूर्णवेळ कामगार तलाठ्याची नियुक्ती करण्यात आलेली नाही.
सध्या अनुप कवान यांच्याकडेच पेठ (ता. आंबेगाव) येथील नियमित कामकाजासोबत मंचरचा अतिरिक्त कार्यभार आहे. त्यामुळे ते अल्पवेळ मंचरमध्ये उपलब्ध होतात. पुन्हा पेठ येथे रवाना होतात. परिणामतः आवश्यक शासकीय दाखल्यांसाठी नागरिकांना प्रतीक्षा करावी लागत आहे. महाविद्यालये व माध्यमिक शाळांमध्ये प्रवेश घेण्यासाठी आवश्यक असलेल्या उत्पन्न प्रमाणपत्रांअभावी पालकांची मोठी धावपळ सुरू आहे.
मंचर ग्रामपंचायतीचे माजी सदस्य लक्ष्मण थोरात म्हणाले, ‘‘मंचर शहराची लोकसंख्या ४० हजारांहून अधिक आहे. येथे कामाचा व्याप प्रचंड आहे. त्यामुळे येथे कामगार तलाठ्यांची नियुक्ती होणे आवश्यक आहे. पुणे जिल्हाधिकाऱ्यांनी या बाबीकडे तातडीने लक्ष देऊन त्वरित पूर्णवेळ कामगार तलाठी देण्याची गरज आहे.’’
या प्रश्नाची दखल घेऊन मंचरचे ग्रामस्थ लवकरच जिल्हाधिकाऱ्यांकडे मागणीचा पाठपुरावा करणार आहेत. मंचर येथील येथील एका ज्येष्ठ महिलेने नावा न छापण्याच्या अटीवर प्रतिक्रिया दिली. त्या म्हणाल्या ‘‘नातीचा महाविद्यालयात प्रवेश घेण्यासाठी उत्पन्नाचा दाखला आवश्यक आहे. मात्र, कामगार तलाठी नसल्यामुळे दुपारनंतर दोन दिवसांपासून कामगार तलाठी कार्यालयात फेऱ्या माराव्या लागत आहेत. लवकरात लवकर पूर्णवेळ कामगार तलाठी नियुक्त व्हावा हीच अपेक्षा आहे.’’